СІМ Мұрат Нұртілеудің шілдедегі суретін жариялады ма?

Қазақстанның сыртқы істер министрлігі Мұрат Нұртілеудің кездесуде жүргенін айтып, сурет көрсетті. Алайда оның нақты қашан өткенін хабарлаған жоқ. Orda.kz бұл суретті тексеріп көріп, 1 шілдеде түскен суретке қатты ұқсас екенін байқады.

Суреттер мен мәтіндер бұрынғы ақпаратпен ұқсас.

Қадірлі оқырман, біз жөпелдемеде жағдайды топшылап, тон пішпеуді жөн көрдік. Тек деректерді, скриншоттар мен сілтемелерді назарларыңызға ұсынамыз.

Ведомство не деді?

«Астана, 2025 жылғы 5 қыркүйек – Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу «Harvest Group» компаниясы директорлар кеңесінің төрағасы Алмаз Әлсеновпен кездесті... Министр жобаны одан әрі ілгерілетудің маңызын атап өтіп, мемлекет тарапынан қолдау көрсетуге дайын екенін білдірді» деп жазды баспасөз қызметі. 

Алайда министрліктің ресми мәтінінде әдеттегідей «бүгін кездесу өтті» деген тіркес жоқ. Келіссөздердің нақты күні көрсетілмеген.

Orda.kz анықтағандай, министрлік дәл осындай кездесуді 2025 жылғы 1 шілдеде де жариялаған. Ол жолы да тура осындай суреттер, дәл осындай мәтін шыққан.

Еске сала кетсек, Orda.kz сыртқы істер министрі Мұрат Нұртілеудің ұсталғаны жайлы хабарлаған болатын.