СІМ Дубайда өмір бойына сотталған 22 жастағы қазақстандықтың ісіне қатысты пікір білдірді

Қазақстан Республикасы сыртқы істер министрінің орынбасары Әлібек Бақаев Дубайда өмір бойына сотталған қазақстандықтың ісіне қатысты түсініктеме берді, деп хабарлайды Orda.kz.

Оның айтуынша, апелляциялық шағым берілген, сондықтан экстрадиция туралы айту әлі ерте. ҚР азаматы Ернұр Алмаханды Дубайдың (БАӘ) бірінші сатыдағы соты өмір бойына бас бостандығынан айыру жазасына кескен.

Министрлік бұл үкімнің әлі түпкілікті емес екені атап өтті. Қазіргі таңда қазақстандықтың қорғаушылары апелляциялық шағым түсірген, бұл оның елге қайтарылуы туралы кез келген әңгімені уақытша тоқтатады. Бақаев Алмаханға нақты қандай айып тағылғанын ашып айтпады, алайда олардың ауыр екенін жеткізді.

«Бас консулдық олармен байланыста деп ойлаймын. Онда бірқатар ауыр құқықбұзушылықтар бар, егжей-тегжейіне тоқталғым келмейді. Сот шешімінде барлығы жазылған. Қателесіп кетуден қорқамын. Бас консулдық, әрине, көмектеседі, себебі бұл — біздің азамат», — деді Бақаев Мәжіліс дәлізінде.

Ернұр Алмахан және тағы бірнеше адам (оның ішінде Өзбекстан азаматтары да бар) 2025 жылдың жаңа жыл түні Дубайдағы виллаға жасалған қарулы шабуылға қатысы бар деген күдікке ілінген. Тергеу нұсқасы бойынша, шабуыл жасағандар үй иесі мен оның жұбайына пышақ жарақатын салып, шамамен 1,2 млн дирхам (шамамен 327 мың АҚШ доллары) көлеміндегі қаражатты қолды еткен.

Бұған дейін Orda.kz тілшісі заңгер Инга Иманбай ұйымдастырған баспасөз мәслихатына қатысып Ернұр Алмахан жайлы оқиғаның мән-жайын жазған еді, толығырақ мына сілтемеден оқи аласыз.

Оқи отырңыз:

• Дубайда 22 жастағы қазақстандық не үшін өмірбақи сотталып, 300 млн айыппұл арқалады?
• Алматы жұртшылығы Шахановты ақтық сапарға шығарып салды
• Жетісуда 23 жастағы дзюдошы қыздың өлімі: Дәрігерлер кінәлі ме?