Шымкенттегі ауруханада жатқан Руслан Берденовтің жағдайы белгілі болды

Желіде оқ тиіп жараланып, ауруханада жатқан Шымкент әкімінің орынбасары Руслан Берденовтің фотосы пайда болды. Суретті танымал кәсіпкер Марғұлан Сейсембаев өзінің Facebook парақшасында жариялады, деп хабарлайды Orda.kz.

Бизнесмен айтып өткендей, Шымкентке сапары кезінде ол Руслан Берденов жатқан ауруханаға арнайы барып, жараланған орынбасардың жағдайын білген. Оның айтуынша, Берденов өзін жақсы сезініп, сауығып келе жатыр.

«Руслан Берденов - мен жеке танитын және әдептілігі үшін құрметтейтін жалғыз саясаткер. Оған жақында қастандық жасалды, бірақ, Аллаға шүкір, ол аман қалды. Қазір оның денсаулығы, көңіл-күйі жақсы. Бәрі жақсы болғанына өте қуаныштымын» деп жазды Марғұлан Сейсембаев. 

Руслан Берденовке қастандық 21 сәуірде жасалды. Шенеунік әкімдік ғимаратынан шығып бара жатқанда оған бес рет мылтықтан оқ атылған. Берденов үш оқ жарақатын алып, сол күні оған ота жасалды. Атқан адам бұрынғы әкімнің орынбасары Ернар Жиембай. Ол қамауға алынды.

Бұған дейін кейбір ақпарат көздерінде шабуыл себебі ретінде күдіктінің әйелімен байланысты қызғаныш жайлы нұсқа тараған болатын. 

Мәжіліс депутаты Айдарбек Қожаназаров Шымкент әкімінің орынбасары Руслан Берденовке жасалған  қастандыққа қатысты пікір білдірді. 

Бұған дейін Руслан Берденовтің ауруханадан шығарылуы мүмкін екені белгілі болған.