Алматыда тұрғын үйдегі өрттен бір адам қаза тапты, тағы төртеуі ауруханада

Алматыдағы Әди Шәріпов көшесі, 145 мекенжайында орналасқан Lamiya тұрғын үй кешенінде болған өртке қатысты жаңа мәлімет белгілі болды. Төтенше жағдайлар департаментінің хабарлауынша, өрт кезінде 148 адам, оның ішінде тоғыз бала құтқарылған, деп хабарлайды Orda.kz.

Өкінішке қарай, қайғылы жағдай болды. Зардап шеккендердің бірі ес-түссіз табылған. Дәрігерлер оның өмірін сақтап қалуға тырысқанымен, нәтиже болмады. Тағы төрт адам ауруханаға жеткізілді.

Өрт 23 тамыз күні сағат 22:49-да басталған. Мамандардың анықтауынша, екінші кіреберістің техникалық бөлмесі мен қабаттарындағы кабельдер, сондай-ақ бірінші кіреберістің жетінші қабатынан 13-қабатына дейінгі электр қалқандарындағы кабельдер жанған.

«Өртті сөндіруге ТЖД-ның шамамен 90 қызметкері мен 25 техника жұмылдырылды. Өрт туралы хабар кеш түскендіктен, жалын қатты таралып кеткен. Алдын ала мәлімет бойынша, автоматты өрт дабылы өрт сөндіру бөлімшелері шақырылғанға дейін бір жарым сағат бұрын іске қосылған. Алайда тұрғындар өрт туралы өртке қарсы қызметке дер кезінде хабарламаған», деп атап өтті ведомство. 

ТЖД бұған дейін жүргізілген өрт-техникалық тексеру нәтижесінде жауапты тұлғаларға өрт қауіпсіздігі талаптары бойынша анықталған бұзушылықтарды жою туралы нұсқама берілгенін атап өтті.

Алайда өрттің нақты шығу себебі әзірге анықталып жатыр.

Оқи отырыңыз:

• «Қара түтінге тұншықтық»: Алматыдағы тұрғын үй кешенінен өрт шықты
• Президент дзюдошыларды жастар арасындағы әлем чемпионатындағы үздік жеңісімен құттықтады