Шымкентте лайк баспаған қызметкерлерін жазалаған шенеунік қызметінен босатылды

Шымкент қаласындағы Жастар ресурстық орталығының басшысы Марат Спатаев қызметінен кетті. Бұл туралы ол өзінің әлеуметтік желідегі парақшасында жазба қалдырды, деп хабарлайды Orda.kz.

Ол әріптестеріне, қызметте серіктес болған азаматтарға алғыс айтты. 

«Құрметті әріптестер, достар, Шымкент қаласының жастары! Бүгіннен бастап Шымкент қаласының «Жастар ресурстық орталығындағы» басшылық қызметімді ресми түрде аяқтаймын. Бұл мен үшін өмірімнің маңызды, жауапты әрі ерекше кезеңдерінің бірі болды. Осы уақыт ішінде бірге жұмыс істеген барлық әріптестеріме, сенім білдірген басшылыққа және қолдау көрсеткен серіктестерге зор алғысымды білдіремін. Жастармен жұмыс істеу – менің жүрек қалауым әрі өмірлік ұстанымым. Осы салада жүзеге асқан әрбір жоба мен атқарылған әрбір іс мен үшін аса құнды» деп жазды Марат Спатаев.

Сонымен қатар, ол жастардың болашағына үлес қосу бағытындағы ізденісі мен еңбегі әрі қарай жалғаса беретінін атап өтті.

Еске сала кетсек, Шымкенттегі «Жастар ресурстық орталығының» интернетте орталықтың желідегі парақшасына лайк баспаған қызметкерлерге басшылық ашық қысым жасап, жазбаша және ауызша ескерту берген еді.