Шымкентте ХҚКО-ның бұрынғы басшысының не себепті тергеу изоляторында көз жұмғаны белгілі болды

Шымкенттегі тергеу изоляторында  ХҚКО-ның бұрынғы басшысы Жомарт Мұрәшімов қайтыс болды. Денсаулық сақтау басқармасы бұған дейін Мұрәшімовтің гипертония, бронх демікпесі және остеохондроз аурулары болғанын мәлімдеді, деп хабарлайды Orda.kz.

18 тамызда Жомарт Мұрәшімовтің жағдайы күрт нашарлаған. Оның қысымы 240/120-ға дейін көтеріліп, цереброваскулярлық жедел бұзылыс пайда болған. Ол дереу нейрореанимацияға жатқызылған. Бірақ науқас 19 тамызда таңертең көз жұмады.

Жомарт Мұрәшімовтің адвокаты Талғат Есімовтің айтуынша, ол қорғауындағы адамның жансақтау бөліміне түскенін айтқан. Алайда сот оны үй қамағына жіберуден немесе кепілге беруден бас тартқан. Сондықтан марқұмның жақтастары изолятор медбикесінің әрекетін және тергеу соттарының жұмысын тексеруді талап етіп отыр. 

Айта кетейік, денсаулық сақтау министрлігі тұтқындарды денсаулық жағдайы бойынша босату ережелеріне өзгерістер жобасын талқылауға шығарды. Босатуға негіз бола алатын диагноздардың жаңартылған тізімі «Ашық НҚА» порталында жарияланды. Ол 5 қыркүйекке дейін қолжетімді.

Еске салайық, Жомарт Мұрәшімов жүргізуші куәліктерін сатты деп айыпталып, күдікті ретінде танылған болатын.