Шымкенттегі тергеу изоляторында бұрынғы ХҚКО-ның басшысы қайтыс болды

Шымкент қаласындағы тергеу изоляторында екінші арнайы халыққа қызмет көрсету орталығының бұрынғы жетекшісі Жомарт Мұрәшімов көз жұмды, деп хабарлайды Orda.kz.

Ол жүргізуші куәліктерін сатты деп айыпталып, күдікті ретінде танылған болатын. Қаралы хабарды оның адвокаты Талғат Әсімов хабарлады.

Мұрәшімов жансақтау бөлімінде жатқан. Адвокаттың айтуынша, денсаулығының нашарлағанына қарамастан, сот оның жазасын бұлтартпау шарасымен үйқамаққа немесе кепілге алмастырудан бас тартқан.

«Медициналық құжаттардың бәрін көрсетіп, соттан бұлтартпау шарасын өзгертуді дәлелді түрде сұрадық. Тергеу сотының судьясы изолятордың медициналық бөлімшесінің басшысы Мұхит Танабековті сұраққа тартты. Ол Мұрәшімовтың денсаулығы қадағалануда деп жауап берді. Ал судья қаулысында адвокаттардың уәждерін негізсіз деп көрсетті!» деп жазды адвокат Талғат Әсімов өз Telegram -арнасында.

Ол изолятордың медициналық бөлім басшысының әрекеттерін тексеруді және «тек ресми түрде қамау мерзімін ұзартатын» тергеу соттарының жұмысына назар аударуды талап етті.

Бұған дейін дәл осы Шымкенттегі тергеу изоляторында денсаулық жағдайына байланысты 73 жастағы жемқорлық ісі бойынша айыпталған Талғат Төлеуов те көз жұмған еді. Ол қамауда отырған уақытында қырық мәрте жедел жәрдем шақыртқан болатын.