Шымкентте дәрменсіз қызды зорлаған ер адам 8 жылға сотталды

Шымкентте есту қабілеті нашар қыздың дәрменсіздігін пайдаланып, оны зорлаған 28 жастағы ер адам 8 жылға бас бостандығынан айырылды, деп хабарлайды Orda.kz.

Қылмыстық істер жөніндегі мамандандырылған ауданаралық сотта айыпталушыға қатысты үкім шықты. Ол жәбірленушіні қорқытып, жыныстық қатынасқа мәжбүрлегені үшін кінәлі деп танылды. Сот оны 8 жылға бас бостандығынан айырып, жәбірленушіге 3 миллион теңге көлемінде моральдық шығын өтеуге міндеттеді.

Жәбірленуші тарап апелляциялық шағым түсірмейтінін мәлімдеді. Алайда сот процесі барысында зардап шеккен қыз соттан айыпталушыға барынша қатаң жаза қолдануды сұраған болатын.

Аталған іс бойынша бастапқыда үш адам күдікке ілінген. Тергеу дерегінше, олардың бірі қызды зорлаған, ал екіншісі қылмысты біле тұра құқық қорғау органдарына хабарламаған. Негізгі айыпталушыға қатысты үкім шығарылды. Ал қалған екі азаматқа қатысты тергеу амалдары жалғасып жатыр.

Еске салайық, осыған дейін, 6 маусым күні Түркістанда мигранттар 16 жастағы қызды зорлап, кейін өлтірген болатын.