Шымкентте 200-ден астам кәсіпкер бағаны көтергені үшін жауапкершілікке тартылды

Әлеуметтік маңызы бар азық-түлік тауарлары бағасына жүргізілген мониторинг қорытындысы бойынша, Шымкент қаласында жыл басынан бері 200-ден астам кәсіпкер жауапқа тартылды, деп хабарлайды Orda.kz.

Қалалық әкімдіктің мәліметінше, 15 сатушы ет бағасын негізсіз көтерген.

«Айта кету керек, сүйегімен бірге сатылатын сиыр етінің жауырын-кеуде бөлігі – бақылауға алынған 19 атаулы әлеуметтік маңызы бар азық-түлік тізіміне кіреді»,  деп мәлімдеді қалалық ауыл шаруашылығы басқармасы. 

Басқарма басшысы Талғат Мекембаевтың айтуынша, Шымкентте шамамен 60 әлеуметтік сауда орны жұмыс істейді. Сонымен қатар, апта сайын ауыл шаруашылығы жәрмеңкелері өткізіліп, онда да сүйекті сиыр еті тұрақты бағамен, яғни 1 келісі 3200-3300 теңге аралығында сатылады.

Алайда тазартылған ет (жұмсақ еті) бағасы реттелетін тауарлар тізіміне кірмейді.

Бұған дейін Ауыл шаруашылығы министрлігі құжатсыз ет саудалайтын кәсіпкерлерге қылмыстық жауапкершілік енгізуді ұсынған болатын.

Сарапшылар Қазақстан халқының кірістері мен шығыстары жөніндегі статистиканы зерттеп, елімізде азық-түлікке жұмсалатын шығын үлесі әлем бойынша ең жоғары деңгейде екенін анықтады.

2024 жылдың басындағы Numbeo деректері бойынша Алматы Орталық Азиядағы ең қымбат қалалар рейтингінде көш бастап тұр.