Шымкент мұнай өңдеу зауытында апаттан екі адам қаза тапты

Шымкент мұнай өңдеу зауытында автокөтергіштің аударылуы салдарынан мердігер компанияның екі қызметкері қаза тапты, деп хабарлайды Orda.kz.

Қазақстан мұнай-газ ассоциациясының telegram-арнасы PetroCouncil мәліметінше, қайғылы оқиға 26 тамыз күні сағат 14:30 шамасында зауыт аумағында болған.

«Изоляция жұмыстарын орындау кезінде автокөтергіш аударылып, екі адамның өліміне себеп болды. Жұмысты мердігер ұйым –  „КРС Астана“ ЖШС жүргізген. Қаза тапқандар осы ұйымның изоляциялау мамандары. Оқиғаның себебін жұмыс тобы анықтап жатыр. Зауыт штаттық режимде жұмысын жалғастыруда.  „ПКОП“ ЖШС басшылығы марқұмдардың отбасыларына шын жүректен көңіл айтады», деп хабарлады компания.

Қылмыстық іс қозғалды.

Еске салайық, тамыз айында Костенко шахтасында болған апаттан 46 кенші қаза тауып, инженерлік-техникалық персонал мен басшылар сотталған еді.