Шығыс Қазақстанда есірткі зертханасы жойылды

Шығыс Қазақстан облысында есірткі зертханасын жою бойынша операция өтті, деп хабарлайды Orda.kz Ұлттық қауіпсіздік комитетінің  баспасөз қызметіне сілтеп.

«Биылғы жылдың тамыз айында Шығыс Қазақстан облысында ұлттық қауіпсіздік комитеті прокуратура органдарының үйлестіруімен есірткі зертханасын жою бойынша операция жүргізді» деп жазылған хабарламада.

Екі күдікті ұсталды. Сот шешімі бойынша олар қамауға алынды.

Тінту барысында 240 литрден астам психотроптық зат, 2 тоннаға жуық прекурсорлар, сондай-ақ есірткі дайындауға арналған зертханалық жабдықтар табылып, тәркіленді.

Қазір ҚР ҚК 297-бабы (Есірткі құралдарын, психотроптық заттарды, сол тектестерді өткізу мақсатында заңсыз сатып алу, сақтау, тасымалдау, жөнелту немесе сату) бойынша сотқа дейінгі тергеу жүргізілуде.

«Қылмыстық іс жүргізу кодексінің 201-бабының 1-бөлігіне сәйкес өзге ақпарат жария етуге жатпайды», деп қорытындылады ҰҚК. 

Қарағанды облысында есірткі заттарын бір аптадан кейін де анықтай алатын жоғары дәлдіктегі құрылғы — газдық хроматограф қолданысқа енгізілді.

Жақында Ұлттық қауіпсіздік комитеті Қызылорда облысында есірткі тасымалдаған парақор прокурорларды ұстады.