Қарағандыда жаңа есірткі талдағыш құрылғы қолданысқа енді

Қарағанды облысында есірткі заттарын бір аптадан кейін де анықтай алатын жоғары дәлдіктегі құрылғы — газдық хроматограф қолданысқа енгізілді, деп хабарлайды Orda.kz.

Құрылғыны Қарағанды облыстық Психикалық денсаулық орталығы қолдана бастады. Ол биологиялық сұйықтықтардан кез келген психоактивті затты дәл анықтай алатын заманауи зертханалық жүйе.

Облыстық бюджет есебінен сатып алынған жаңа жабдық дәрігерлерге күрделі клиникалық жағдайларда көмектесіп қана қоймай, мас болып көлік жүргізгендерді анықтауға және жасөспірімдер арасындағы тәуелділікті ерте кезеңде анықтауға мүмкіндік береді.

Газдық хроматограф — бұл несеп құрамынан тек дәстүрлі есірткіні ғана емес, сондай-ақ микродозадағы синтетикалық заттарды да бірнеше күннен кейін де анықтай алатын аса сезімтал талдау жүйесі. Құрылғының кіріктірілген базасында екі мыңнан астам химиялық қосылыс бар. Хроматограф жергілікті биліктің бастамасымен сатып алынып, 180 миллион теңгеге түсті. Орталық мамандарының айтуынша, алғашқы зерттеулер-ақ оның тиімділігін дәлелдеген.

«Кейбір жағдайларда экспресс-тесттер теріс нәтиже көрсетсе де науқастың ағзасында синтетикалық есірткі болған. Біздің құрылғы бұл заттың психостимуляторлар тобына жататынын нақты анықтап берді. Ол өте сезімтал», — дейді Қарағанды облыстық психикалық денсаулық орталығының стратегиялық даму жөніндегі директорының орынбасары Василий Габов. 

Хроматографтың көмегімен медициналық куәландыру процедурасы әлдеқайда сенімді болады. Бұл дәрігерлерге тіпті дизайнерлік немесе дәрілік препараттар қолданған жүргізушілерді де оңай анықтауға мүмкіндік береді.

Алайда бұл құрылғы айыптау үшін ғана емес, қорғау құралы да бола алады. Егер жүргізуші дәрі қабылдағаны немесе құрамында көкнәрі бар тәтті жегені үшін қате жазаланып жатса, хроматограф оның кінәсіздігін дәлелдеуге көмектеседі.

Мамандардың айтуынша, құрылғы клиникалық тәжірибеде де өте пайдалы. Көптеген науқас қандай зат қолданғанын нақты білмейді, ал жаңа жабдық дәрігерлерге дәл диагноз қоюға және тиімді ем тағайындауға көмектеседі.

Сондай-ақ бұл хроматограф баласының есірткі қолданғанынан күдіктенген ата-аналар үшін де маңызды құрал болмақ.

Қазіргі таңда Психикалық денсаулық орталығының дерегінше, өңірде есепте тұрған адамдар саны шамамен 8 мыңға жеткен. Ресми статистика сәл төмендегенімен, бұл тәуелділердің азайғанын білдірмейді.

«Бұл сандардың төмендеуі кейбір науқастардың жасырын түрде емделуіне байланысты», деп нақтылады орталық. 

Құқықтық және медициналық тұрғыдан бұл жаңа құрылғы есірткі мен ішімдікке мас жүргізушілерге қарсы күресте маңызды құрал болмақ. Соңғы уақытта мұндай жүргізушілердің саны заң қатайғанына қарамастан көбейіп отыр.

Еске сала кетейік, Премьер-министр Олжас Бектенов есірткіге қарсы күрес бойынша жаңа бағдарлама әзірлеуді тапсырған болатын.