Швеция халықаралық іздеуде жүрген қазақстандық әйелді экстрадициялады

Швеция билігі Қазақстанға жалған шетелдік банкноттарды ірі көлемде сатты деген күдікті әйелді экстрадициялады, деп хабарлайды Orda.kz  Бас прокуратураның баспасөз қызметіне сілтеме жасап.

Швеция Әділет министрлігі Қазақстан Бас прокуратурасының іздеуде жүрген азаматша Б-ны экстрадициялау туралы өтінішін қанағаттандырды.

Тергеушілердің мәліметінше, күдікті 2019 жылдың желтоқсаны мен 2020 жылдың қаңтары аралығында Қазақстандағы банктердің бірінің қызметкерлерінің көмегімен жалған еуро банкноттарын заңсыз айырбастаған.

Қылмыстары анықталғаннан кейін ол қазақстандық сот төрелігінен жасырынып,шетелге қашып кеткен, одан кейін  халықаралық іздеуге жарияланған. Оның сыбайластары да  әртүрлі мерзімге бас бостандығынан айырылды.

22 наурызда Бас прокуратура мен Қаржы мониторингі агенттігі қызметкерлері Сыртқы істер министрлігінің көмегімен күдіктіні қылмыстық жауапкершілікке тарту үшін Қазақстанға экстрадициялады.

Қазіргі уақытта ол Астана қаласы түзеу мекемелері департаментінің уақытша ұстау изоляторына қамалды. Мұндай қылмыс жасағандар 5 жылдан 10 жылға дейін бас бостандығынан айырылады.