Shubat Fest: Маңғыстауда шұбат пен түйе сүтінен жасалған өнімдер фестивалі өтеді

Маңғыстау облысында түйе шаруашылығын дамытуға, шұбат өндіруге және дәстүрлі сусынды кеңінен насихаттауға арналған Shubat Fest фестивалі өтеді, деп хабарлайды Orda.kz облыс әкімдігіне сілтеп.  

Іс-шара өңір әкімдігінің қолдауымен ұйымдастырылып отыр. Маңғыстауда фестиваль аясында ең үздік шұбат пен түйе сүтінен жасалған өнімдер анықталады

Байқауға онлайн тіркелу 1–10 тамыз аралығында болады.

Облыстық Қоғамдық коммуникациялар орталығының мәліметінше, фестиваль аясында шұбат пен түйе сүтінен жасалған өнімдер көрмесі, дәм тату шаралары, өндірушілер арасындағы байқау, ғылыми-тәжірибелік кездесулер мен салалық талқылаулар ұйымдастырылады. Сондай-ақ фермерлер арасында тәжірибе алмасуға арналған алаңдар мен мәдени бағдарлама қарастырылған.

Фестивальге түйе өсірумен айналысатын шаруашылықтар, өндірушілер мен қайта өңдеу кәсіпорындарының өкілдері шақырылады. Сонымен қатар іс-шараға ғылыми ұйымдар, мемлекеттік құрылымдар өкілдері, инвесторлар мен Қазақстанның түрлі өңірлерінен келген кәсіпкерлер қатысады.

Қатысушылар тіркеуден өткеннен кейін олардың жұмыстарын қазылар алқасы бағалайды. «Ең үздік шұбат» номинациясы жеңімпазы зертханалық сараптама мен халықтың онлайн дауыс беру қорытындысы бойынша анықталады.

Шұбаттан бөлек, қатысушылар түйе сүтінен жасалған ең үздік өнім өндіруші атағы үшін де бақ сынайды. Номинациялар қатарында ең дәмді құрт, балқаймақ және түйе сүтінен жасалған десерт те бар. Байқаудың бас жүлдесі — автокөлік.

Shubat Fest фестивалінің финалы 29 тамыз күні амфитеатр алаңында өтеді. Іс-шараның нақты басталатын уақыты ұйымдастырушылар тарапынан қосымша хабарланады.

Оқи отырыңыз:

• Бозжыра шатқалы әлемдегі ең көрікті шөлдердің ондығына енді
• Маңғыстау облысында қатты нөсер мен дауылдан үйлерді су алып, шатырлар ұшты