ШҚО-да жолдағы бала өліміне қатысты жол-құрылысы ұйымының бас инженері сотталды

Қайғылы оқиға 2025 жылғы 31 қазанда Күршім – Қалжыр – Ақсуат тас жолының 37-шақырымында болған. Отбасымен жол жүріп келе жатқан 37 жастағы аудан тұрғыны жолдың үстінде жатқан топырақ үйіндісіне соғылған, деп хабарлайды Orda.kz.      

Жол-көлік оқиғасы салдарынан көлік тізгініндегі азаматтың 2019 жылы туған ұлы оқиға орнында қаза тауып, ал 2017 жылы туған қызы дене жарақаттарын алған.

Кәмелетке толмаған жолаушының өліміне себеп болды деп айыпталған 53 жастағы жол-құрылыс компаниясының бас инженері қатысты қылмыстық істі тергеу үш айға созылды.

Күршім аудандық полиция бөлімінің қызметкерлері айыптының жолдағы топырақ үйінділері көлік қозғалысына қауіпті екенін білгенін нақтылады. Жол құрылысына жауапты компания қызметкерлері  «Қазақстан Республикасындағы жол жүрісі туралы» заң талаптарына қарамастан, жөндеу жұмыстары жүріп жатқан жол учаскесіне ескерту жол белгілерін орнатуды қамтамасыз етпеген.

Осы жылдың қаңтарында іс сотқа жолданып, наурыз айында сот айыптау үкімін шығарды.

Бас инженер «Көліктегі қолданыстағы ережелерді бұзу» бабының үшінші бөлігі бойынша — абайсызда адам өліміне әкеп соққан әрекеті үшін кінәлі деп танылды.

Оған бір жыл мерзімге бас бостандығынан айыру жазасы тағайындалып, жол қозғалысы қауіпсіздігін қамтамасыз етуге байланысты лауазымдарды атқару құқығынан айырылды.

Еске салсақ, 2026 жылы Қазақстанда жол жұмыстарының барлық түрімен шамамен  11 мың шақырым автомобиль жолын қамту көзделіп отыр. Бұл туралы ҚР Көлік вице-министрі Мақсат Қалиақпаров жыл басында мәлім етті.

Оқи отырыңыз:

• Алматыда LRT құрылысы үшін 270 жер учаскесі алынады
• 2026 жылы еліміздің қай жолдары жөндеу көретіні белгілі болды
• Қазақстандағы кейбір жолдар 20 жыл бойы жөндеу көрмеген