Сhildfree идеологиясына қарсы пәтуа: «Кедейлік – бала тумай қоюға себеп емес»

Қазақстан мұсылмандары діни басқармасы шариғат нормалары бойынша childfree идеологиясына тыйым салды, деп хабарлайды Orda.kz.       

Қазақстан мұсылмандары діни басқармасы (ҚМДБ) childfree идеологиясына қарсы пәтуа шығарды. Муфтияттың мәлімдеуінше, саналы түрде бала сүюден бас тарту шариғатқа қайшы келеді.

Пәтуа шығару үшін ҚМДБ childfree идеологиясын және оның негізгі уәждерін талдап, келесі себептерді анықтаған. Олардың айтуынша бала тумауға көп айтылатын себептер: баланы тәрбиелеуге қаражат жұмсағысы келмеу, жауапкершіліктен бас тарту, жеке еркіндік пен мансапты бірінші орынға қою.

Муфтият бұл дәлелдердің барлығын ислам қағидаларымен үйлеспейді деп атады.

Сонымен қатар муфтият жүктілікті уақытша кейінге қалдыруға рұқсат берілетінін атап өтті, бірақ тек дәлелді себептер болған жағдайда. Мұндай шешімді ерлі-зайыптылар бірлесіп қабылдауы тиіс және қолданылатын әдіс денсаулыққа зиян келтірмеуі қажет.

ҚМДБ сондай-ақ childfree идеологиясы отбасы институтын әлсіретіп, қоғам мен ұлттың болашағына кері әсер ететінін атап өтті.

Бұған дейін ҚМДБ дипфейк жасау мен таратуды да күнә деп танығаны хабарланған болатын. Муфтияттың түсіндіруінше, жалған бейнероликтер арқылы адамдарға олар жасамаған әрекеттер мен айтпаған сөздер таңылады. Мұндай материалдар адамның беделіне нұқсан келтіреді және алдау болып саналады, ал исламда кез келген зиян келтіруге қатаң тыйым салынған.

Оқи отырыңыз:

• ҚМДБ-ның өз жасанды интеллект жобасы болады
• Қазақстанда исламдық экономикаға қатысты шариғат кеңесін құру ұсынылды
• Қарт әкесін сабап, оны видеоға түсіріп таратқан «батыр бала» бес тәулікке қамалды