Әскери кафедрада оқығандар екі жылдық қызметке шақырыла ма?

Қазақстан Республикасының Қорғаныс министрлігі әскери кафедра түлектерін екі жылдық қызметке шақыру тәртібін түсіндірді, деп хабарлайды Orda.kz.       

Бұл туралы ведомствоның вице-министрі Асқар Мұстабеков мәлімде жасады.

Оның айтуынша, әскери кафедраны бітіріп, офицерлік шен алған түлектер кадрлық жұмылдыру резервін толықтыру үшін екі жыл мерзімге әскерге шақырылуы мүмкін.

«Кадрлық әскери қызметкерлер жеткілікті. Қазіргі таңда офицерлерді кадрлық мобилизациялық резерв қалыптастыру үшін шақырып жатыр. Олар екі жылға алынады. Бұл қандай да бір геосаяси жағдаймен байланысты емес. Мамандар жеткілікті, бірақ барлық әскери мамандық иелері мобилизациялық қызметтен өтуі қажет», — деді вице-министр. 

Сонымен қатар, ол әскери кафедрада оқу тек әскери билет алу үшін емес екенін де атап өтті.

«Адам не үшін әскери кафедраға оқуға түседі? Тек әскери билет алу үшін емес, офицерлік шен алып, Отан қорғау үшін. Бұл — оның конституциялық міндеті. Егер ол офицер атанса, онда армияда қызмет өтіп, теориялық білімін тәжірибемен нығайтуы керек. Осыдан кейін ғана ол мемлекеттің толыққанды мобилизациялық резервіне енеді», — деді Асқар Мұстабеков. 

Оның сөзінше, қызметін аяқтағаннан кейін запастағы офицерлер қажетті тәжірибе жинап, елдің мобилизациялық резервінің бір бөлігіне айналады.

Бұған дейін Қазақстан Қарулы күштеріне жаңадан шақырылған сарбаздар үшін психологиялық бейімделудің екі апталық кезеңі енгізілетіні туралы жаздық.

Бұл туралы Сенат дәлізінде Асқар Мұстабеков мәлімдеген болатын. Оның айтуынша, Қазақстан Қарулы Күштері Бас штабы жауынгерлік дайындықтың жаңа жоспарын әзірлеген. Енді қызметтің алғашқы екі аптасында жас сарбаздарға бірден нақты әскери лауазым тағайындалмайды.

Оқи отырыңыз:

• Әскерде сарбаздарға психологиялық бейімделуге екі апта уақыт беріледі
• Әскерге көшеден бас салып алып кете беруге бола ма? Заңгер жауабы
• Енді Қазақстан сарбаздары швед үстелінен тамақтанады