Шетелге шығуға тыйым салынған қазақстандық Ресей үшін соғысып қаза тапты

Астанаға қара жұмысқа кеткен ер адам Ресей әскерінің қатарында соғып, Украинада қаза тапқандар тізімінен табылды. Шетелге шығуға тыйым салынған марқұмның шекараны қалай асып кеткені белгісіз деп хабарлайды Orda.kz.

«Орал апталығының»  мәліметінше, күйеуі соғыста қайтыс болған келіншектің айтуынша ол Астанаға ақша табуға кеткен, арада біраз уақыт өтіп арадағы байланыс үзілген.

Ал 15 қазанда Украинадағы «Хочу жить» жобасы Ресей үшін соғысқан қазақстандықтардың тізімін жариялаған. Сол тізімнен оралдық әйел өзінің күйеуінің аты-жөнін көріп аң-таң болған. 30 жастағы марқұм Алексей Сергеев «Хочу жить» тізімінде 191-нөмірмен көрсетіліпті. 

Әйелдің сөзінше, олар өткен жылы үйленген, сегіз ай бұрын қызы дүниеге келген соң, ер адам Астанаға жұмыс істеуге кеткен. Онда қара жұмысшы болып жан бағып жүрген екен. Әйеліне соңғы рет 27 наурызда қоңырау шалған, содан бері хабарсыз кеткен.

Ең күдіктісі — Сергеевке заң бойынша шетелге шығуына тыйым салынған екен. Әйелі оның осы тыйымға қарамастан қалайша бірінші Ресейге, кейін Украинаға барғанын түсінбейді. 

«Хочу жить» тізімінде Сергеев Ресей қарулы күштерінің 103-ші мотожаяу әскер полкінде қызмет еткені жазылған. Украинадағы Deep State сайтының дерегінше, бұл бөлімше 2025 жылдың ақпанынан бері жалғасып келе жатқан Торецк үшін шайқастарға қатысып келеді. Орал тұрғынының қаза болған күні ретінде 2025 жылғы 11 шілде көрсетіліпті.

Қазір Надежда күйеуінің өлім туралы куәлігін алуға және оның мәйіті қай жерде екенін анықтап, жерлеуді ұйымдастыруға тырысып жүр.

«Хочу жить» жобасы жариялаған тізімде Ресей үшін соғысып, қаза тапқан 270 қазақстандықтың аты-жөні көрсетілген.