Шерзат соты: судья Ержан Жанұзақов істен шеттетіле ме?

Шерзат Полат ісіне қатысты сотта айыпталушы Абзал Шынасылдың адвокаты судья Ержан Жанұзақовты істен шеттетуді сұрады, деп хабарлайды Orda.kz.

Шерзат Полаттың қазасына байланысты өтіп жатқан сот отырысында Абзал Шынасылдың қорғаушысы Жұмат Әбенов судьяға қарсылық білдірді.

Бұл өтінішті қарау үшін басқа судья келуі керек болғандықтан, сотта үзіліс жарияланды. Алайда қорғаушы не себепті мұндай өтініш жасағаны әзірге белгісіз. Себебі дәл сол сәтте сот отырысының тікелей көрсетілімі тоқтап қалды.

«Қылмыстық-процесс кодексінің 87-бабының 11-бөлігіне сәйкес, істі жеке қарап жатқан судьяға қатысты білдірілген қарсылықты осы соттың төрағасы немесе басқа судья қарайды. Аталған заң нормасына сәйкес, қарсылықты осы соттың судьясы Беймбетов А.А. қарайтын болады», — делінген Жоғарғы соттың түсіндірмесінде.

Жәбірленуші тараптың адвокаты Шекеев Жұмат Әбеновтың не үшін судьяға қарсылық білдіргенні айтып берді.

«Адвокат Әбеновтың судьяға қарсылық білдіруіне себеп болған жәйт бүгін прокурор тарапынан фото техникалық сараптама қортындысы жарияланды. Сол бойынша Әбенов сарапшыдан жауап алу үшін сотқа шақыруды сұрады. Судья оны қажет деп таппады, себебі сарапшының қортындысы жазбаша түрде іс құжаттарында тіркелген. Сол себепті судья Әбеновтың өтінші талабын қанағаттандырмады, сол кезде адвокат судьяға қарсылығын білдірді. Енді судья Жанұзақов өзіне көрсетілген қарсылықты қарай алмайды, сол үшін Қаскеленнен басқа судья немесе соттың төрағасы келе жатыр сол қарайды», — деді Шекеев.

Айта кетейік, бүгінгі сот отырысында іс материалдарын қарау жалғасуы тиіс болатын. Сонымен қатар, сотқа Нұрғанат Ғайыпбаевқа сот-медициналық сараптама жасаған маман келді.