Шахтинск қаласындағы жарылыста адамдарды құтқарған бес полицей марапатталды

08 мамыр 2026 07:02 Ләззат Сұңқар

Фото: Polisia.kz

Қарағанды облысының бес полицейі Шахтинск қаласында газ баллоны жарылған кезде тұрғындарды құтқару барысында көрсеткен ерлігі мен жанқиярлығы үшін марапатталды, деп хабарлайды Orda.kz.

Ішкі істер министрлігінің ведомстволық сайтының мәліметінше, аталған оқиға кезінде батылдық танытқан бес полиция қызметкері Қазақстан Республикасы Президентінің Жарлығымен «Ерлігі үшін» мемлекеттік медаліне ие болды.

Жарақат алып, қалалық ауруханада ем алып жатқан қызметкерлерді Қарағанды облысына Ішкі істер министрінің тапсырмасымен келген ІІМ-нің жеке құраммен жұмыс департаментінің бастығы Олжас Мырзабеков арнайы барып көрді.

Сонымен қатар Қарағанды облысы полиция департаментінің бастығы Нығмет Исмағұлов бірге қызметтік міндетін атқару кезінде зардап шеккен полицейлермен кездесті. Кездесу барысында ІІМ өкілі олардың әрекеттері нағыз ерліктің, антқа адалдықтың және азаматтар алдындағы жоғары жауапкершіліктің үлгісі болғанын атап өтті.

Оның айтуынша, төтенше жағдайда адамдарды құтқару жолында өз өмірін қатерге тігуге дайын болған қызметкерлердің батыл әрекеттері мемлекет басшысы тарапынан жоғары бағаланған. Мұндай істер әрдайым есте сақталып, жас қызметкерлерге үлгі болады.

Салтанатты рәсім барысында Президент Жарлығы оқылып, «Ерлігі үшін» медалі Руслан Тазиев, Асхат Бердібеков, Нұргелді Құлжабеков, Ерназ Өскенбай және Дулат Ситахметов табысталды. Полицейлер мемлекет басшысы мен ІІМ басшылығына көрсетілген жоғары баға үшін алғыс білдірді.

Патрульдік полиция взводының инспекторы Ерназ Ускенбайдың айтуынша, сол сәтте олар тек адамдарды құтқаруды ғана ойлаған.

«Ешкім өз өміріне төнген қауіп туралы ойлаған жоқ. Бұл – біздің кәсіби әрі адамдық борышымыз. Бұл марапат мен үшін үлкен құрмет қана емес, зор жауапкершілік», – деді ол.

Ал Дулат Ситахметов мемлекеттік марапат оның қызметіне қосымша ынталандыру бергенін айтты.

Еске салайық, 23 наурызға қараған түні Шахтинск қаласындағы тұрғын үйлердің бірінде тұрмыстық газ баллонынан газ-ауа қоспасының жарылысы болған.

Оқиға салдарынан сегіз адам зардап шекті, оның бесеуі – полиция қызметкерлері. Барлығы медициналық мекемеге жеткізілді.

Кейін Қарағанды облысы полиция департаменті бұл іс бойынша 40 жастағы күдікті ұсталғанын хабарлады. Қазіргі уақытта ол Шахтинск қалалық ауруханасының арнайы палатасында ем алып, күзетпен қамауда отыр.

Оқи отырыңыз:

Жаңалықтар

барлық жаңалықтар