Сербия президенті Александр Вучич қызметтен кететінін мәлімдеді

Сербия президенті Александр Вучич Белградтағы митингте президенттік қызметіндегі соңғы апталарын өткізіп жатқанын мәлімдеді, деп хабарлайды Orda.kz.       

«Бұл – менің президент ретіндегі соңғы апталарым», – деді Вучич. Алайда ол нақты қай кезде қызметінен кететінін айтпады.

Митингке қатысқан BBC-дің Сербия қызметінің тілшісі Вучичтің саясаттан кететінін жарияламағанын, тек өзі жетекшілік ететін Сербияның прогрессивті партиясына сайлауда «айқын жеңіске жетуге» көмектесуге уәде бергенін хабарлады.

Вучичтің екінші әрі Конституция бойынша соңғы президенттік мерзімі 2027 жылдың ортасында аяқталады. Бүгінгі митингте Сербия президенті елде мерзімінен бұрын парламенттік сайлау өтетінін жариялады, бірақ оның нақты күнін атаған жоқ.

Сербия Ішкі істер министрлігінің мәліметінше, Белградтағы митингке 200 мыңнан астам адам қатысқан.

2024 жылғы 1 қарашада Нови-Сад қаласында теміржол вокзалы ғимаратының кіреберісіндегі бетон қалқа опырылып құлап, 16 адам қаза тапты. Көптеген серб азаматтары бұл қайғылы оқиғаны жемқорлықтың салдары деп есептеп, билікке наразылық білдірді.

Бұл апат Вучичтің билігі тұсындағы Сербиядағы ең ірі саяси дағдарыстың басталуына себеп болды. Сонымен қатар, ол жемқорлыққа қарсы жаппай наразылық шерулеріне түрткі болып, мерзімінен бұрын жалпыұлттық сайлау өткізуді талап етуге ұласты.

Оқи отырыңыз:

• ӘЧ–2026: Бельгия G тобында жеңіске жетті, Иранның тағдыры кейінірек шешіледі
• Мектепке жөндеу жүргізілмесе де 78 млн теңге төлеген шенеуніктер жазаланды