Сенат басшысы: Пара беруге уәде еткеннің өзі — қылмыстық жауапкершілік, туыстар бір мекемеде жұмыс істей алмайды

Пара беруге уәде еткеннің өзі — қылмыстық жауапкершілік. Сенат аппаратының басшысы Максим Споткай елімізде пара беруге уәде еткен адам қылмыстық жауапкершілікке тартылатынын мәлімдеді, деп хабарлайды Orda.kz.        

Ол Telegram-дағы парақшасында сенаторлардың сыбайлас жемқорлыққа қарсы іс-қимыл мәселелері бойынша және соған ілеспе бірқатар заңдарды қабылдағанын хабарлады.

Жаңа нормалар жемқорлық тәуекелдерінің алдын алуға, жауапкершілікті күшейтуге және мемлекеттік қызмет пен квазимемлекеттік сектордағы мүдделер қақтығысын жоюға бағытталған.

«Мүдделер қақтығысының алдын алудың толыққанды тетігі енгізіледі, мемлекеттік қызметшілер мен оларға теңестірілген тұлғаларға қызметтік өкілеттіктерін жеке мүддесіне пайдалануға тыйым салынады. Жеке мүдделерді декларациялау міндеті белгіленеді және мүдделер қақтығысы туындаған жағдайда әрекет етудің нақты тәртібі айқындалады» деп жазды ол. 

Сонымен қатар туыстар мен байланысты тұлғалардың бірге қызмет атқаруына қойылатын шектеулер күшейтіледі. Бұл шектеулер енді тек тікелей бағыныштылыққа ғана емес, сондай-ақ жанама ықпал ету, ішкі бақылау, кадрлық сүйемелдеу және өзге де әсер ету түрлеріне қатысты қолданылады.

Мәселен, бір ведомствода басшының жиендері, қайындары, құдалары, қайнағалары, күйеу балаларының жұмыс істеуіне тыйым салынады.

«Сыбайлас жемқорлыққа қарсы шектеулер қолданылатын тұлғалар шеңбері кеңейтіледі. Олардың қатарына квазимемлекеттік сектор қызметкерлері мен бюджет және Ұлттық қор есебінен қаржыландырылатын жобаларға қатысушылар да кіреді. «Е-қызмет» цифрлық кадрлық жүйесінің жұмысы заң жүзінде бекітіледі,  мемлекеттік органдар мен квазимемлекеттік сектордағы кадрлық процестер бірыңғай цифрлық форматқа көшіріледі», – деді Сенат аппаратының басшысы. 

Сондай-ақ Максим Споткай Қазақстанда тек пара алу мен беруге ғана емес, сонымен бірге пара беруге уәде етуге, ұсынуға немесе талап етуге де қылмыстық жауапкершілік енгізілетінін атап өтті.

Бұдан бөлек, мемлекеттік ұйымдар мен квазимемлекеттік секторда заңсыз сыйақы алу үшін жауапкершілік күшейтіледі.

«Заңды тұлғалардың сыбайлас жемқорлық құқықбұзушылықтары үшін әкімшілік жауапкершілігі артады. Жеке тұлғалар үшін әкімшілік сыбайлас жемқорлық құқықбұзушылықтарының ескіру мерзімі бір жылдан үш жылға дейін ұзартылады» деп жазылған хабарламада. 

Сонымен қатар сыбайлас жемқорлық қылмыс жасаған тұлғаларға қатысты шектеулер нақтыланады: мемлекеттік функцияларды орындауға байланысты лауазымдарға өмір бойы жұмысқа орналасуға тыйым салынады.

Оқи отырыңыз:

• Арнайы ХҚКО басшылығы жүргізуші куәлігі үшін пара алып, сотты болды
• Депутаттар қандай түйткілді сауал көтеріп жатыр?
• Қытайдың екі экс-қорғаныс министрі өлім жазасына кесілді