Сарыағашта арнайы есепке ілінген жүздеген адам жүргізуші куәлігінен айырылды

Түркістан облысының Сарыағаш ауданында прокурорлардың араласуынан кейін 89 адамның жүргізуші куәлігінің күші жойылды, деп хабарлайды Orda.kz.        

Бұл туралы Бас прокуратураның ресми Telegram-арнасында хабарланды.

Анықталғандай, аталған азаматтар наркологиялық және психиатриялық есепте тұрған. Соған қарамастан, олар жүргізуші куәлігін алып, автокөлік басқаруға жіберілген.

Қадағалау органы өкілдерінің айтуынша, қолданыстағы заңнамаға сәйкес психикалық және мінез-құлық бұзылыстары бар, сондай-ақ психоактивті заттарды қолдануға байланысты сырқаттары бар адамдар медициналық қарсы көрсетілімдер болған жағдайда көлік құралдарын басқаруға жіберілмейді.

Прокурорлық қадағалау актісі негізінде соттар аталған азаматтардың жүргізуші куәліктерін жойды.

Ал жауапты лауазымды тұлғалар тиісті жауапкершілікке тартылды.

Еске салсақ,  жақында арнайы ХҚКО басшылығының жүргізуші куәлігін беру кезінде пара алғаны әшкереленді. ҰҚК «Азаматтарға арналған үкімет» мемлекеттік корпорациясы қызметкерлеріне қатысты қылмыстар бойынша тергеуді бастады.

Әртүрлі өңірлерде ұқсас жемқорлық схемалары, атап айтсақ, ақшаға жүргізуші куәлігін алуға көмектесу, мемлекеттік нөмірлерді тіркеу, сондай-ақ активтерді қайта рәсімдеу және шектеулерді алып тастау сияқты қылмыстар жетерлік.

Оқи отырыңыз:

• Қазақстандықтар енді БАӘ-де жүргізуші куәлігін оңай айырбастай алады
• Денсаулығың көтермесе - көлік жүргізбе: 1787 адамның жүргізуші құқығы жойылды
• Арнайы ХҚКО басшылығы жүргізуші куәлігі үшін пара алып, сотты болды