Садыр Жапаров қазақтар мен қырғыздарды арандатушылыққа жол бермеуге шақырды

Қырғызстан президенті Садыр Жапаров қазақтар мен қырғыздарды халықтар арасындағы араздықты қоздыруға бағытталған арандатушылыққа берілмеуге шақырды, деп хабарлайды Orda.kz.

Садыр Жапаров қырғызстандықтарды тыныштық сақтауға және қырғыз-қазақ қарым-қатынасын сынамауға шақырды. Президенттің бұл үндеуді жолдауына Кенесары хан мен оның қырғыз жерлеріне жорығы туралы айтылған YouTube-тегі екі сағаттық бейне себеп болған. 

Президент бұл тарихи оқиғаны алауыздық тудырғысы келетін адамдардың жиі қолданатынын атап өтті. Ол Кенесары ханның өлімі араздыққа себеп болмауы керектігін айтты. Жапаров қазақтар мен қырғыздар ғасырлар бойы қатар өмір сүріп келе жатқанын, бір-бірін қолдап, тығыз туыстық байланыста болғанын атап өтті.

Президент өзінің арғы атасы Солтонқұлдың әйелі қазақ болғанын мысал ретінде келтірді. Президент «қазақ халқының жиені» екенін мәлімдеді. Оның айтуынша, екі ел арасында мұндай байланыстар өте көп. 

Еске сала кетейік, қырғыз әншісі Қайрат Примбердиев «Airan» YouTube-арнасына берген сұхбатында Кенесары ханның басын алу оқиғасын қозғап, осы жағдай үшін қазақ халқынан өз атынан кешірім сұраған. 

Осы сөздерден кейін Примбердиевтің айтуы бойынша, оның айтқан сөздеріне қатысты әлеуметтік желілерде түрлі пікірлер пайда болған. Бірқатар қолданушылар әншінің бұл тақырыпты көтергенін орынсыз деп есептеді. Осыдан кейін Қайрат өзінің Instagram парақшасында бейнежазба жариялап, жағдайды түсіндіруге мәжбүр болды.

Кейін Қырғыз Республикасының Мәдениет министрінің орынбасар Марат Тағаев әншіні сынға алды. Ол «мұндай құбылыс пен көршілес елдерден келген пропаганда жастар мен мәдениет қайраткерлеріне әсер етеді» деп мәлімдеді. Оның үстінен қылмыстық іс қозғалды. Ол «нәсілдік, этникалық, ұлттық, діни және аймақаралық араздық қоздыру» бабымен кінәлі деп танылып, айыппұл арқалаған еді.