Руслан Берденовке оқ атқан Жиенбай 9 жылға сотталды

Шымкент қаласы әкімінің орынбасары Руслан Берденовке қастандық жасау ісі бойынша сот үкім шығарды. Ернар Жиенбай 9 жылға бас бостандығынан айырылды, деп хабарлайды Orda.kz.

Судья Әбинұр Қарабаев әкім орынбасарына оқ атқан Ернар Жиенбайды 9 жылға бас бостандығынан айыруға үкім етті. Ол жазасын орташа қауіпсіздік мекемесінде өтейтін болады.

Сонымен қатар, сотталушы жәбірленушінің пайдасына 30 АЕК төлеуге міндеттелді. Бұл 118 890 теңге болады.

Еске сала кетейік, 21 сәуірде Руслан Берденовке әкімдік ғимаратының жанында Ернар Жиенбай бір емес бес рет оқ атып, оның үшеуі Берденовке тиген еді. Оқ атқан жәбірленушінің қоластындағы қызметкері Ернар Жиенбай Шымкент қаласының құрылыс басқармасына қарасты «Тұрғын үй Шымкент» ЖШС-нің бұрынғы директоры. 

Айта кетейік, бұған дейін прокурор Ернар Жиенбайды 11 жыл 3 ай бас бостандығынан айыруды сұраған болатын.