Руслан Берденов қастандық жасаған ер адамның жұбайына тиіскені рас па?

Шымкент әкімінің орынбасары Руслан Берденовке жасалған қарулы шабуылға қатысты жаңа деректер жарияланды, деп хабарлайды Orda.kz.

Бұған дейін кейбір ақпарат көздерінде шабуыл себебі ретінде күдіктінің әйелімен байланысты қызғаныш жайлы нұсқа тараған болатын. 

Күдіктінің жұбайы бұл ақпаратты жоққа шығарды. Қастандық жасаған ер адамның жұбайы Руслан Берденовты танымайтынын және онымен ешқашан байланыста болмағанын айтты. 

Шымкент қаласы әкімдігінің ішкі саясат басқармасының басшысы Айгерім Жұмагұлова әлеуметтік желіде тараған күдіктінің әйелі мен Руслан Берденов арасындағы жақын қарым-қатынасқа қатысты нұсқаларға жауап берді.

«Жаңа ғана полиция департаментінде күдіктінің жұбайымен сөйлестім. Әйел адам куәлік беру үшін келген. Оның айтуынша, ол Руслан Берденовты мүлде танымайды, ешқашан сөйлесіп те көрмеген», — деп жазды Жұмагұлова.

Алдын ала болжам бойынша, оқиға тұрмыстық сипаттағы жанжалдан туындаған. Күдікті — 1994 жылы туған азамат, Шымкент қаласы әкімдігіне қарасты бір серіктестікте жұмыс істеген. Ол Руслан Берденовтың қарамағында болып, жуырда ғана қызметінен босатылған.

Руслан Берденовке шұғыл ота жасалып жатыр. Дәрігерлер оның өкпе және бауыр тұсынан жараланғанын айтып, жағдайын «орташа ауыр» деп бағалауда.