Рудный қаласының бас прокуроры ұсталды

Рудный қаласының бас прокуроры ұсталды. Бас прокуратураның мәліметінше, операция 28 қыркүйекте Қостанай облысы прокуратурасы мен ҰҚК департаменті бірлесіп жүргізген, деп хабарлайды Orda.kz.

Ведомствоның баспасөз қызметі қылмыстық жауапкершілікке тартылатын әрекетке қатысы бар деген күдікпен ұсталғанын мәлімдеді. Өзге жайттар жария етілмеді.

Ашық дереккөздерге қарағанда, ұсталған – Мұрат Успанов. Мұрат Теміртасұлы Ұспанов 1978 жылдың 16 желтоқсанында Торғай облысының Октябрь ауданына қарасты Вильямс ауылында дүниеге келген. 2004 жылы Ахмет Байтұрсынов атындағы Қостанай мемлекеттік университетін тәмамдады.

Прокуратура органдарында 2005 жылдан бері қызмет атқарып келеді, жалпы еңбек өтілі – 20 жыл. Әр жылдары Наурызым ауданы прокуратурасында, Рудный қаласы мен Қостанай облысы прокуратурасында түрлі лауазымдарды атқарған.

Кейін Лисаков қаласы прокурорының орынбасары, Амангелді ауданының прокуроры, 2019 жылдан бастап Арқалық қаласының прокуроры болды. 2024 жылдың 6 қыркүйегінде Қазақстан Республикасының Бас прокурорының бұйрығымен Рудный қаласының прокуроры болып тағайындалды.

Ол сыбайлас жемқорлыққа, яғни, пара алу дерегіне байланысты ұсталған болуы мүмкін.