Ресейде «қазақ қыздарын бағындырамын» деген «пикаперге» қылмыстық іс қозғалды

Әйелдерді «бағындыруға» үйретемін деп танылған ресейлік блогер Алекс Лесли (шын аты — Александр Кириллов) енді қылмыстық жауапкершілікке тартылғалы жатыр, деп хабарлайды Orda.kz.

25 маусымда Мәскеудің тергеу комитеті оған зорлыққа итермелеу бабы бойынша іс қозғалғанын хабарлады.

Тергеу нұсқасына сенсек, Лесли өз «оқырмандарына» әйелдерге қарсы жыныстық сипаттағы әрекет жасауға кеңес беріп, мұны бейнежазбаларында көрсеткен. Қазір тергеушілер болған оқиғаның барлық мән-жайын анықтап жатыр.

Алекс Лесли есімі Қазақстанда да талай дауға себеп болған. 2022 жылы ол Алматыда әйелдерді бағындыруға арналған тренинг өткізетінін жариялап, жұрттың ашуын туғызған. Артынша «қазақ қыздарына мобилизация жариялаймын» деп елге келуге тырысқан.

The Insider басылымының жазуынша, Лесли тренингтерінде ерлерге көшеде бейтаныс қыздарға тиісіп, қол жүгіртіп, интимдік ұсыныс жасауға дейін кеңес берген.

Әлеуметтік желілерде оның құрбандарының бейнежолдаулары таралып жатыр. Олар басынан өткен жағдайды айтып, басқа қыздарды мұндай әрекеттерге қарсы тұруға үндеп, флешмоб бастаған.

Еске сала кетейік, бұған дейін еліміздегі белгілі «ZTB» атты БАҚ-тың негізін қалаған Марғұлан Тұрсынов орыс халқына деген ерекше ықыласын ашық айтқан еді.