Ресей шекарасы маңында белгісіз дрондар байқалды: БҚО тұрғындары алаңдаулы

Батыс Қазақстан облысы тұрғындары Ресей шекарасы маңында белгісіз дрондарды көргендерін айтты. Бұл туралы жергілікті «Уральская неделя» басылымы жазды, деп хабарлайды Orda.kz. 

Куәгерлердің сөзінше, ұшқышсыз ұшу аппараттары Ресейдің Самара облысы жағынан ұшып келген. Аспанда бір мезетте шамамен оншақты дрон байқалған.

«Олар өткізу бекеті мен шекара бекеті үстінен ұшып жүрді. Мұндай жағдайды бірінші рет көріп тұрған жоқпыз. Біздің шекарашылардың өзі де бұл туралы білмейді...» — дейді жергілікті тұрғындардың бірі.

Оқиға әлеуметтік желілерде де қызу талқыланып жатыр. Тұрғындар дрондардың қайдан ұшырылғанына және олардың нақты мақсаты қандай болғанына алаңдаушылық білдіруде.

Бұл жағдайға қатысты ҚР қорғаныс министрлігі пікір білдірді.

«Қазақстан Республикасының әуе кеңістігін бұзу фактілері тіркелген жоқ. Жағдай тиісті қызметтердің бақылауында»,  деп хабарлады ведомство.

Соңғы айларда Ресеймен шекаралас аймақтарда белгісіз дрондарға қатысты ақпарат жиілеп кетті. Бұған дейін де Қазақстан аумағында немесе шекара маңында ұшқышсыз аппараттардың байқалғаны туралы хабарлар тараған еді.
 
 Оқи отырыңыз:

БҰҰ-ның Гаагадағы халықаралық соты ереуілге шығу құқығы туралы шешім шығарды

ИРСК: Ормуз бұғазы арқылы бір тәулікте 35 кеме өтті