ИРСК: Ормуз бұғазы арқылы бір тәулікте 35 кеме өтті

Ислам революциясы сақшылар корпусының әскери-теңіз күштері бақылауымен 35-тен астам кеме Ормуз бұғазы арқылы өтті, деп хабарлайды Orda.kz.      

Өткен тәулікте мұнай тасымалдаушы танкерлер мен контейнерлік кемелерді қоса алғанда шамамен 35 азаматтық кеме Ормуз бұғазы арқылы Ислам революциясы сақшылар корпусының әскери-теңіз күштері-мен бағытты келісу арқылы қауіпсіз өткен. Бұл туралы ИРСК ақпараттық порталы мәлімдеді.

Иран жағының мәлімдеуінше, барлық кеме қозғалысы ИРСК әскери-теңіз күштерінің бақылауымен және қорғауымен жүзеге асырылады. Бұғаз арқылы мұнай тасымалдайтын танкерлер де өтуде.

Бұған дейін Иран Ормуз бұғазы арқылы кеме қатынасына жаңа ережелер енгізілетінін хабарлаған еді. Осы мақсатта Тегеран Парсы шығанағы бұғаздары әкімшілігін (Persian Gulf Strait Authority, PGSA) құрды. Бұл орган ресми түрде «бақыланатын аймақтың» бірыңғай шекарасын белгіледі.

Аталған аймақтың шекарасы екі сызықпен айқындалады, шығыста Ирандағы Кух-е-Мүбарак тауынан бастап, Біріккен Араб Әмірліктеріндегі Фуджейра әмірлігінің оңтүстік бөлігіне дейін созылады. Ал батыс кіреберісі Иранның Кешм аралының шетінен БАӘ-нің Умм-әл-Кувейн қаласына дейінгі аралықты қамтиды.

Израиль мен АҚШ-қа тиесілі немесе осы елдермен қандай да бір байланысы бар кемелерге бұғаздан өтуге тыйым салынған. Ал бейтарап және достық елдердің кемелері үшін толық келісу талап етіледі, дегенмен оларға транзитке тікелей тыйым жоқ.

Сонымен қатар Иран парламентінде транзиттік алымдар мен арнайы баж салығын енгізу туралы заң жобасы қарастырылып жатыр. Бұл алымдар дұшпан емес елдердің кемелеріне қатысты болуы мүмкін. Кеме капитандары бұғаздан өту үшін алдын ала рұқсат алып, бағытты PGSA басқармасымен толық келісуі тиіс.

Бұған дейін Иран мұнай тасымалдайтын танкерлерден әр баррель үшін 1 доллар көлемінде баж салығын алып отырғаны туралы ақпарат тараған еді. Ведомство мәліметінше, сауда кемелерінің қозғалысы бұғаз акваториясындағы кеме қатынасы қауіпсіздігін қамтамасыз ету шаралары аясында қалыпты режимде жүзеге асырылған.

Иран жағы Ормуз бұғазы аймағындағы күшейтілген бақылау мен мониторинг Ислам революциясы сақшылар корпусының әскери-теңіз күштері бөлімшелері арқылы тұрақты негізде жүргізіліп отырғанын атап өтті.

Бұл шаралар аймақтағы жағдайды тұрақтандыру және АҚШ Қарулы күштері әрекеттерінен кейін туындаған шиеленіс аясында кеме қатынасына төнетін қауіптердің алдын алу мақсатында қолға алынған.

Оқи отырыңыз:

• Иран мен АҚШ арасындағы бітімгерлік соңғы кезеңге жетіп қалды
• Моджтаба Хаменеи бұйрық шығарды: Иран уранын шетелге бермейтін болды
• Иран Ормуз бұғазы арқылы Қытай кемелерінің өтуіне рұқсат берді