Ресей мен Польша арасындағы дипломатиялық қатынас үзілуге шақ тұр

Польшада Ресейдің соңғы консулдығы жабылды. Ресей президентінің баспасөз хатшысы Дмитрий Песковтың айтуынша, бұл екі ел арасындағы қарым-қатынастардың іс жүзінде толық үзілгенін көрсетеді, деп хабарлайды Orda.kz.      

Кремль бұл шешімді Варшаваның Ресеймен кез келген дипломатиялық және консулдық байланыстарды барынша қысқартуға бағытталған саясатының жалғасы ретінде бағалап отыр.

Дмитрий Песков бұны Мәскеу мен Варшава арасындағы қатынастар «толық тоқырауға ұшырады» деп бағалады. Оның пікірінше, Польша билігі саналы түрде екі ел арасындағы ресми диалогтың барлық мүмкін арналарына тосқауыл қойып отыр. 

Ресей Сыртқы істер министрлігі Польша тарапының бұл қадамы жауапсыз қалмайтынын ескертті. РФ СІМ-нің ресми өкілі Мария Захарова Польшаның Гданьск қаласында орналасқан Ресейдің бас консулдығының жабылуына «жауап қайтарылатынын» ескертті. Оның сөзінше, Ресей өз аумағында Польшаның дипломатиялық және консулдық қатысуын қысқартатын болады.

Соңғы жылдары Ресей мен Польша арасындағы қарым-қатынас біртіндеп нашарлай бастады. Бұған геосаяси келіспеушіліктер, қауіпсіздік мәселелері, Еуроодақ пен НАТО шеңберіндегі Польша ұстанымы, сондай-ақ Ресейге қарсы енгізілген санкциялар әсер етті. Польша өзін Шығыс Еуропадағы Ресей саясатына қарсы ең қатаң позиция ұстанатын елдердің бірі ретінде көрсетіп отыр.

Консулдықтың жабылуы — дипломатиялық дағдарыстың ең соңғы әрі ең қатаң кезеңі саналады. Өйткені консулдық мекемелер, әдетте, саяси шиеленістер кезінде де азаматтардың құқықтарын қорғау, визалық қызмет көрсету және гуманитарлық байланыстарды сақтау үшін жұмысын жалғастыра береді. Ал олардың жабылуы мемлекеттер арасындағы сенімнің мүлде жойылғанын білдіреді.

Бұл шешім ең алдымен екі елдің азаматтарына әсер етеді. Ресей азаматтары Польшада, сондай-ақ Польша азаматтары Ресейде консулдық көмек алу мүмкіндігінен айырылады. Визалық рәсімдер қиындайды, құқықтық және төтенше жағдайларда көмек алу уақыты ұзаруы мүмкін. Сонымен қатар мәдени, білім беру және іскерлік байланыстар да айтарлықтай шектеледі.

Еске салсақ, Польшадағы Ресейдің соңғы бас консулдығы 2025 жылы 22 желтоқсанда  жабылды. Консулдық қызметкерлері заттарын шығарып, ғимараттың жанында дипломатиялық нөмірі бар автокөліктер мен жүк машинасы тұрғанын сол күні жергілікті WPolityce.pl басылымы хабарлады.

Әңгіме Гданьскідегі бас консулдық туралы болып отыр. Оның сайтында келушілерді қабылдау 1 желтоқсанда тоқтатылғаны айтылған. Консулдық азаматтарға сұрақтары бойынша Варшавадағы Ресей елшілігінің бейінді бөліміне жүгінуді сұрап хабар таратты.

Бас консулдықты жабу туралы шешімді Польша билігі қабылдады. Республиканың сыртқы істер министрі Радослав Сикорский мұны темір жолдағы бірнеше оқиғамен байланыстырды. Қарашаның ортасында Польшадан Украинаға баратын жолдарға бірнеше рет зақым келген. Зардап шеккендер болған жоқ. Польша прокуратурасы теракт туралы іс қозғады.

Польша премьер-министрі Дональд Туск теміржол бөлігінің қирауын диверсия деп атады. Осы оқиғалардан кейін Польшаның сыртқы істер министрлігіне Ресейдің Польшадағы уақытша сенімді өкілі Андрей Ордаш шақырылды. Мәскеу барлық айыптарды жоққа шығарды.

Қарашаның соңында Ресей СІМ Варшава әрекетіне жауап ретінде Иркутскіде орналасқан Польшаның елдегі соңғы консулдығы жабылғанын жариялады.

Сарапшылардың пікірінше, жақын арада Ресей мен Польша арасындағы дипломатиялық қатынастың қалпына келуі екіталай. Қазіргі жағдайда тараптар тек өзара шектеу шараларын күшейту арқылы әрекет етуде. Бұл үрдіс Еуропадағы жалпы геосаяси шиеленістің бір бөлігі ретінде қарастырылады.

Тақырыпқа сай ұсынамыз:

• Дипломатиялық деңгейдегі тыңшылық: Польшада ұсталған қазақстандық әскери атташенің көмекшісі жайлы не белгілі?
• Астана Мәскеудің қол астында ма? Қазақстан Польшада ұсталған тыңшыны қайтаруға барын салып жатыр
• Франция, Германия, Ұлыбритания және Польша басшылары Киевке келді