Рефендум: Аккредиттелген халықаралық байқаушылармен бірқатар кездесу өтті

14 наурызда Қазақстан Республикасының Орталық референдум комиссиясында аккредиттелген халықаралық байқаушылармен бірқатар кездесу өтті, деп хабарлайды Orda.kz.       

Олардың қатарында шет мемлекеттердің орталық сайлау органдары мен халықаралық ұйымдардың өкілдері бар. Сонымен қатар шетелдік сайлау әкімшіліктері басшыларымен екіжақты кездесу ұйымдастырылды.

Қазақстандағы республикалық референдумға халықаралық қауымдастық тарапынан бұрын-соңды болмаған қызығушылық байқалды. Оның дайындалуы мен өткізілу барысын жақын және алыс шетелден келген өкілдер бақылайтын болады.

14 наурызда Орталық референдум комиссиясында шет мемлекеттердің орталық сайлау органдары басшыларына арналған дәстүрлі брифинг те өтті.

Халықаралық қатысушылармен өзара іс-қимыл референдум кезеңінде аккредиттелген шетелдік бұқаралық ақпарат құралдары өкілдеріне арналған брифингпен жалғасты. Оны Орталық референдум комиссиясы төрағасының орынбасары Мұхтар Ерман мен комиссия мүшесі Ләззат Сүйіндік өткізді. Брифингке халықаралық сарапшылар да қатысты.

Күн бойы Орталық референдум комиссиясы басшылығының шетелдік серіктестермен бірнеше екіжақты кездесуі өтті.

Күннің бірінші жартысында Орталық референдум комиссиясының төрағасы Нұрлан Әбдіров Өзбекстан Республикасының Орталық сайлау комиссиясының төрағасы Зайниддин Низамходжаевпен және Тәжікстан Республикасының Сайлау және референдумдар жөніндегі орталық комиссиясының төрағасы Бахтиёр Худоерзодамен кездесті.

Аталған іс-шаралар барысында Нұрлан Әбдіров қатысушыларды қазіргі референдум науқанының барысы мен негізгі ерекшеліктері туралы хабардар етті. Референдумға дайындық, сайлау инфрақұрылымының және дауыс беру учаскелерінің дайындық деңгейі, дауыс беру қорытындыларын шығару мерзімдері мен тәртібі, сондай-ақ референдум өткізуге қатысты өзге де мәселелер жөнінде толық ақпарат ұсынылды.

«Халықаралық ұйымдардың миссиялары мен орталық сайлау органдары делегацияларының референдумды халықаралық деңгейде бақылау үшін қатысуына біз ерекше мән береміз. Бұл алдағы референдумға шетелдік серіктестердің қызығушылығы жоғары екенін көрсетеді. Халықаралық байқаушылар үшін референдумның дайындалуы мен өткізілуін толыққанды бақылауға барлық қажетті жағдай жасалған. Орталық референдум комиссиясы дауыс беру рәсімдерінің барынша ашықтығын, айқындығын және заңдылығын қамтамасыз етеді», – деп атап өтті Нұрлан Әбдіров. 

Кездесулер мен брифингтер барысында Орталық референдум комиссиясының төрағасы қатысушылардың сұрақтарына жауап берді.

Өз кезегінде шетелдік байқаушылар халықаралық бақылауды тиімді жүргізуге қажетті жағдай жасалғаны үшін алғыс айтып, республикалық референдумды өткізуге дайындық деңгейіне жоғары баға берді.

Оқи отырыңыз: 

• Тұрғындарды «референдумға тіркеу» сылтауымен алдап жатыр
• Референдум өткізуге үкімет резервінен шамамен 21 млрд теңге бөлінді
• Дауыс беру кезінде «өшіп кететін сия» туралы бейнеге ОКҚ түсініктеме берді