Қытайда 25 баланы улаған мұғалім өлім жазасына кесілді

Қытайда әріптесімен жанжалдасқан әйел өзін ренжіткен әріптесінен кек алу үшін балалардың тамағына натрий нитриті қосқан.

Қытай төрт жыл бұрын балаларды қасақана улаған балабақша тәрбиешісіне өлім жазасын кесті, деп хабарлайды Orda.kz.  Thepaper.cn.  сайтына сілтеме жасап.

2019 жылдың наурыз айында Цзяозуо қаласындағы балабақшада жаппай тамақтан улану оқиғасы болды. Полиция 40 жастағы мұғалім Ван Юнның мектеп жасына дейінгі балалардың ботқасына натрий нитритін қосқанын анықтады. Уланған балалардың бірі 10 ай емделгеннен кейін көз жұмды, қалғандары ауруханаға жатқызылды.

Қылмысқа Ван кек алғысы келген балабақшадағы әріптесімен жанжал себеп болған.

Әйел денсаулығына қасақана зиян келтіргені үшін алғашында тоғыз айға бас бостандығынан айырылғанымен, кейін бұл жаза өлім жазасына ауыстырылған. Ван шешімге шағымдануға тырысты, бірақ Хэнань провинциясының жоғары халық соты шағымды қабылдамады.

Сондай-ақ, тергеушілер осы әйелдің 2017 жылы жанжалдан кейін өзінің күйеуінің сусынына натрий нитритін салып жібергенін анықтады. Нәтижесінде ол  орташа дәрежеде уланған.

Бұған дейін Атырауда ерекше балаларды азаптаған мұғалім төрт жылға сотталған болатын. Ол кәмелетке толмағандарды физикалық және психикалық азапқа ұшыратқаны, жүйелі түрде ұрып-соққаны үшін кінәлі деп танылды.