Қазақстандықтар Ресей азаматтығын оңайлатылған тәртіппен ала алады

Ресей Беларусь, Қазақстан, Молдова және Украина азаматтарының азаматтық алуын жеңілдететін заңнамаға түзету әзірлеп жатыр.

Ресейде «Азаматтық туралы» заңға өзгерістер енгізу жоспарланып отыр. Ол Ресей Федерациясында тұрақты тұратын және тұруға рұқсаты бар Қазақстан, Беларусь, Молдова және Украина азаматтарының оңайлатылған азаматтық алу құқығын қалпына келтіреді, деп хабарлайды РИА Новости.

Заң жобасының бірінші оқылымда қабылданған нұсқасында мұндай құқық президент жарлығы арқылы берілген.

«Президенттің заң жобасына түсіндірме жазбада аталған санаттағы азаматтарға Президент жарлығы арқылы азаматтық алу құқығы берілуі мүмкін екендігі айтылған. Бірақ Жарлықты күтудің қажеті қанша? Қолданыстағы заң оларға бұл құқықты берсе, жаңа заң оны неге алып тастайды? Ұсынылған түзету бұл мәселені алып тастайды» деп түсіндіреді Мемлекеттік Думаның ТМД істері жөніндегі комитеті төрағасының бірінші орынбасары Константин Затулин.

Сондай-ақ парламентарий Ресейде тұру шарттары туралы баяндады, бұл жеңілдетілген тәртіпте азаматтық алуға да әсер етуі мүмкін. Оларды үш жылдан бір жылға дейін қысқартуды ұсынып отыр.

Еске салайық, 2022 жылғы 5 сәуірде бірінші оқылымда қабылданған заң жобасы азаматтықтан айыру, оның ішінде террористік сипаттағы қылмыстар, мемлекетке қарсы ауыр қылмыстар, сондай-ақ адам саудасы саласындағы қылмыстар үшін көзделген болатын.

Заң жобасы 20-дан астам санаттағы тұлғаларға Ресей азаматтығын қабылданған кезде қойылатын талаптардың санын қысқартуды, сондай-ақ мемлекет басшысының оңай алуға құқығы бар тұлғалар санатын анықтау жөніндегі өкілеттіктерін кеңейтуді көздейді.

Қазақстанда 2023 жылдан бастап басқа азаматтығын қасақана жасырғаны үшін жауапкершілікті күшейту жоспарлануда. Осы мақсатта заңнамалық актілерге бірқатар түзетулер әзірленуде. Бұл туралы Ішкі істер министрлігінің өкілі Шұғыла Тұрлыбек хабарлады.

— Қазақстанның қос азаматтықты мойындамайтынын айта кеткен жөн, сондықтан мұндай фактілерді анықтау жұмыстары ерекше бақылауда,- деп атап өтті Тұрлыбек.

Ол заңнамада Қазақстан Республикасы азаматтығынан айырылған қазақстандықтың төлқұжатын немесе жеке куәлігін пайдаланғаны, сондай-ақ бұл туралы белгіленген мерзімде хабарламағаны үшін әкімшілік жауапкершілік қарастырылғанын еске салды. Мұндай фактілерді жасырғаны үшін 200 АЕК-ке дейін айыппұл салу немесе елден шығару қарастырылған.