Астанада 224 жер учаскесі мемлекет қажетіне алынады

Елордада мемлекеттік қажеттіліктер үшін жер телімдерін сатып алуға 12 миллиард теңгеден астам қаржы бөлу жоспарланып отыр. Бұл қаражатқа 224 учаске мектептер, скверлер, инженерлік және жол-көлік инфрақұрылымы нысандарын салуға пайдаланылмақ, деп хабарлайды Orda.kz.       

«Ашық бюджеттер» порталында қалалық Тұрғын үй және тұрғын үй инспекциясы басқармасы тиісті бағдарлама жариялады. Құжатқа сәйкес, 2026 жылы 224 жер телімін сатып алуға 12 676 069 000 теңге қажет.

Басқарма мәліметінше, жоспар аясында жер учаскелерін мемлекет қажетіне алу (сатып алу арқылы), ондағы жылжымайтын мүліктерді бұзу, меншік иелеріне өтемақы төлеу және құрылысқа қажетті аумақтарды босату қарастырылған.

Ведомство өкілдері жер телімдері мен ондағы мүліктің құны нарықтық бағамен анықталатынын атап өтті. Бағалау жұмыстарын мемлекеттік сатып алу конкурсы арқылы таңдалған тәуелсіз сарапшылар жүргізеді. Егер жер иесі мен жергілікті атқарушы орган келісімге келсе, тиісті шарт мәслихат қарауына жіберіледі. Ал келісім болмаған жағдайда, жерді мәжбүрлі түрде алып қою сот тәртібімен жүзеге асырылады.

Жоспар бойынша, 2026 жылы 27 әлеуметтік нысан салу үшін жер телімдері алынады:

• 4 білім беру нысаны үшін – 94 учаске (жалпы аумағы 1,4 га);
• 6 жол-көлік инфрақұрылымы нысаны үшін – 22 учаске (1,4 га);
• 8 абаттандыру және сквер нысандары үшін – 62 учаске (2,9 га);
• 3 инженерлік инфрақұрылым нысаны үшін – 20 учаске (2,9 га);
• 6 өзге нысан үшін – 1 учаске (0,6 га).

Алайда нақты қандай жер телімдері алынатыны туралы тізім жарияланбаған.

Сонымен қатар, 2027–2028 жылдары да елордада жыл сайын 130 учаскені сатып алуға шамамен 13 миллиард теңгеден бөлу жоспарланып отыр. Бірақ бұл әзірге тек жоспар, алдағы уақытта басқа да өзгерістер болуы мүмкін.

Оқи отырыңыз:

• Мемлекет басшысы Брюссельге ресми сапары барысында отандастармен кездесті
• Қандай пост, пікір, репост үшін 20 жыл түрме беріледі? Прокуратура қазақстандықтарға ескерту жасады