Қаржы пирамидасының басшысы Украинадан экстрадицияланды

Қаржы пирамидасын ұйымдастырды деп айыпталған күдікті Астанадағы уақытша ұстау изоляторына қамалды.

Украина Бас прокуратурасы Қазақстан Бас прокуратурасының сұранысымен қаржы пирамидасы қызметін ұйымдастырғаны және оны басқарғаны үшін қылмыстық жауапкершілікке тарту мақсатында Қазақстан азаматы «К»-ны экстрадициялау туралы өтінішін қанағаттандырды, деп хабарлайды Бас прокуратураның баспасөз қызметі.

«Тергеу барысында аталған тұлғаның 2017-2018 жылдар аралығында тұрғын үй алуға көмектесемін деп алаяқтық жолмен Қазақстан азаматтарының 85 миллион теңгеден астам қаражатын иемденгені анықталды. Қылмыс жасағаннан кейін азамат «К» қылмыстық қудалау органдарынан қашып кетіп, оған халықаралық іздеу жарияланған»  делінген хабарламада.

Ағымдағы жылдың қаңтар айында күдіктіні осы елдің құқық қорғау органдары Украина аумағында ұстаған болатын.

«Бүгінде ҚР Бас прокуратурасы мен Интерпол қызметкерлері шетелдік серіктестердің көмегімен «К» есімді азаматты елімізге экстрадициялады. Қазіргі уақытта ол Астана қаласының уақытша ұстау изоляторына қамалды»  деп хабарланды ведомстводан.

Бас прокуратура мұндай қылмыстар үшін 5 жылдан 12 жылға дейін бас бостандығынан айыру жазасы қарастырылатынын да еске салды.