Qarakesek атымен танылған рэперге сот үкімі шықты

Ақтөбеде Qarakesek атымен танылған Омар Амантаевқа қатысты сот үкімі жарияланды. Рэпер сот барысында есірткіні заңсыз сақтағанын толық мойындады. Сот отырысына келмегендіктен, кеше оны полиция қызметкерлері мәжбүрлі түрде жеткізгені белгілі болды, деп хабарлайды Orda.kz.      

Ақтөбе қаласының № 2 соты Амантаевты психотроптық заттарды сату мақсатынсыз заңсыз сақтағаны үшін кінәлі деп таныды. Оған 100 сағат қоғамдық жұмыс жазасы тағайындалып, психиатрдың бақылауында мәжбүрлі ем қабылдау міндеттелді. Сонымен қатар, оны бақылау қызметі есепке алды. Егер белгіленген қоғамдық жұмыстардан жалтарса, өтелмеген уақыт қамауға алу жазасына ауыстырылуы мүмкін.

Өткен жылдың тамыз айында рэпер есірткі қолданып алып, көлік жүргізіп жүрген жерінен ұсталған. Сол кезде оны 15 тәулікке қамап, 7 жылға көлік жүргізу құқығынан айырған. Тексеру барысында оның жанынан 0,26 грамм мефедрон табылып, сараптама бұл заттың есірткі екенін растаған.

Сотта Омар Амантаев шамамен бір жылдан бері есірткі қолданатынын және емделетін ниеті бар екенін айтты.

«Кінәмді толық мойындаймын, айыптаумен келісемін. Синтетикалық затты тауып алдым, сату ойымда болған жоқ», – деді ол. 

Прокурордың «Бұл заттың синтетикалық екенін қалай білдіңіз?» деген сұрағына ол «Білемін, көргенмін» деп жауап берген.

31 жастағы Омар Амантаев Батыс Қазақстан облысының тумасы. Үйленген, төрт баласы бар.

Тақырыпқа қатысты ұсынамыз:

• Қазақстандық Qarakesek атты рэпер есірткіге мас күйі ұсталды
• Репер Qarakesek 7 жылға автокөлік жүргізу құқығынан айырылды
• Алматыда республика тарихында ең алғаш рет ірі кокаин есірткісі тәркіленді