Прокурор Жанәбіловтерге жаза мерзімін сұрады

Соттағы жарыссөз барысында мемлекеттік айыптаушы Олжас Хайруллаев блогер Жанәбіловтерге  қатысты нақты жаза тағайындауды сұрады, деп хабарлайды Orda.kz.

Прокурордың сөзінше, іс материалдары толық зерттеліп, заң талаптарына қайшы келетін жайттар анықталмаған.

«Қылмыстық жауаптылықты жеңілдететін немесе ауырлататын мән-жайлар анықталған жоқ. Жиналған дәлелдемелерді жарамсыз деп тануға негіз болатын қылмыстық-процестік заң бұзушылықтар да жоқ», – деді ол.

Ол жасалған қылмыстардың қоғамдық қауіптілігін ескере отырып, жаза тағайындау қажет екенін атап өтті. Прокурордың ұсынысына сәйкес, айыпталушы Ерболат Жанәбіловті бірнеше бап бойынша кінәлі деп танып, әр эпизод бойынша жаза тағайындау сұралды:

«Қылмыстық Кодекстің 214-бабы 2-бөлігі бойынша – 2 жыл 6 ай, 218-баптың 2-бөлігі бойынша – 4 жыл бас бостандығынан айыру жазасын, мүлікті тәркілеумен бірге тағайындауды сұраймын. Неғұрлым қатаң жазамен жеңілін құрту арқылы, түпкілікті 4 жыл бас бостандығынан айыру жазасын, қылмыстық-атқару жүйесінің ең төменгі қауіпсіздік мекемесінде өтеуді белгілеуді ұсынамын. Айыпталушыға қатысты үйқамақ түріндегі бұлтартпау шарасын қамауға алумен алмастырып, сот залында қамауға алуды сұраймын», – деді прокурор.

Эльмира Төлегеноваға қатысты да прокурор жаза мерзімін сол көлемде, алайда жазаны өтеуді кейінге қалдыруды ұсынды:

«Қылмыстық кодекстің 74-бабы 1-бөлігіне сәйкес, тағайындалған жазаның орындалуын бір жылға кейінге қалдыруды сұраймын», – деді ол.

Бұдан бөлек, прокурор соттан келтірілген залалды өндіру, мүлікті тәркілеу және процессуалдық шығындарды өтеу мәселесін шешуді сұрады. Атап айтқанда, қылмыстық жолмен алынған кірісті өндіріп алу, iPhone 16 маркалы 17 ұялы телефон мен Hyundai маркалы 8 автокөлікті тәркілеу ұсынылды.

Оқи отырыңыз:

• Блогер Жанәбіловтер отбасының ісі бойынша сот тыңдауы басталды
• Жанәбіловтердің адвокаты прокурорды заңды бұрмалады және БАҚ арқылы қысым көрсетті деп айыптады
• Белгілі блогерлер Жанәбіловтердің сотында куәгерлік етеді