Блогер Жанабыловтар отбасының ісі бойынша сот тыңдауы басталды

Бүгін Астанада блогерлер Жанабыловтар отбасының ісі бойынша сот тыңдауы басталды. Істі Астананың қылмыстық істер жөніндегі мамандандырылған ауданаралық сотының судьясы Әділбек Баймаханов қарап жатыр, деп хабарлайды Orda.kz.      

Бұған дейін Қаржылық мониторинг агенттігі сотқа дейінгі тергеудің аяқталғанын және іс материалдары сотқа жолданғанын хабарлаған.

Жанабыловтар отбасының адвокаты Гаухар Айтжанова бірнеше өтінішхат білдірді. Атап айтқанда, істі прокурорға қайтаруды сұрады. Айыптау тарапы бұл өтінішпен келіспей, барлық дәлелдер мен уәждерді негізгі сот талқылауы барысында зерттеуді сұрады.

Тергеу блогерлерді келесі баптар бойынша айыптап отыр:

• ҚР ҚК 214-бабы – заңсыз кәсіпкерлік;
• ҚР ҚК 218-бабы – қылмыстық жолмен алынған ақшаны заңдастыру (жылыстату).

Кеңесу бөлмесінен шыққаннан кейін судья негізгі сот талқылауы 16 наурызда өтетінін жариялады. Іс фигуранттарына қатысты шектеу шарасы өзгеріссіз қалды — үйқамақ.

Еске салайық, тергеу нұсқасы бойынша Ерболат Жанабылов пен оның жұбайы Эльмира Төлегенова әлеуметтік желілерде жүлде ұтыстарын өткізіп, оқыту курстарын сатқан. Бұған дейін олар үйқамаққа алынған. Жанабыловтарға екі жылға дейін бас бостандығынан айыру жазасы қаупі төніп тұр. Отбасы сот залында өздерінің бейнелерін жариялауға тыйым салуды өтінді. Судья өтінішті қанағаттандырды. Дегенмен сот процесін ашық форматта өткізу туралы шешім қабылданды.

Айыпталушылардың адвокаты Гаухар сот отырысында істі прокурорға қайтару туралы өтініш жасағанын айтты. Оның сөзінше, қылмыстық іс материалдарында бірқатар заңбұзушылықтар бар, алайда оларды әзірге жария түрде талқылау ерте.

«Бүгін мен барлық бұзушылықтарды айтқан жоқпын. Негізгі сот талқылауы 16-сы күні басталады. Материалдарды зерттеуді әлі бастаған жоқпыз, сондықтан қазір бұл туралы толық пікір айтуға ерте», — деді адвокат.

Сондай-ақ қорғаушы айыпталушылардың жеке өмірі мен олардың балаларының мүддесін ескеру маңызды екенін атап өтті. Оның айтуынша, Жанабыловтар отбасында кішкентай балалар бар, сондықтан ата-анасының бейнесі мен ісі төңірегіндегі жағымсыз пікірлер балаларға әсер етуі мүмкін. 

Адвокат әлеуметтік желілерде тараған айыпталушылардың қоғамдық орындарға барғаны туралы пікірлерге де түсініктеме берді. Оның айтуынша, үйқамақ шарттары бойынша олар кешкі сағат 22:00-ден таңғы 07:00-ге дейін ғана үйде болуы тиіс.

«Қалған уақытта, әсіресе кішкентай балалары барын ескерсек, олар балаларын киноға немесе сауда орталығына апара алады. Мұндай әрекеттер сотпен рұқсат етілген», — деді қорғаушы.

Сондай-ақ адвокаттың айтуынша, айыпталушыларға телефон мен мессенджерлерді пайдалануға рұқсат берілген. 

Оқи отырыңыз:

• Ерболат Жанабылов пен Эльмира Төлегенова қылмыстық іс бойынша сотқа тартылады
• Апелляциялық алқа Ерболат Жанабыловтың ісі бойынша сот қаулысын өзгеріссіз қалдырды
• Қаржылық мониторинг агенттігі Жаңабыловтар отбасын өз бақылауына алды