Президент партияларға Құрылтай депутаттары тізімін бекітуге 28 тамызға дейін уақыт берді

Қазақстан президенті Қасым-Жомарт Тоқаев сайлау қорытындысы бойынша Құрылтайға өткен партиялар 28 тамызға дейін депутаттар тізімін қалыптастыруы тиіс екенін мәлімдеді. Бұл туралы мемлекет басшысы тамыз конференциясында айтты, деп хабарлайды Orda.kz.       

Партияларға Құрылтай депутаттары тізімін қалыптастыруға 28 тамызға дейін уақыт берілді
Тоқаев саяси партиялардың белсенділігін, идеологиялық дайындығы мен кәсібилігін атап өтті.

«Конституцияның 46-бабына сәйкес, мен 28 тамызда бірінші шақырылымдағы Құрылтайдың алғашқы сессиясын шақыру туралы жарлыққа қол қойдым. Осы уақытқа дейін Құрылтайға өткен партиялар депутаттардың тізімін қалыптастыруы тиіс», – деді президент. 

Мемлекет басшысының айтуынша, партиялар ұсынған тізімдерге түрлі салаларда тәжірибесі мол кәсіби мамандармен қатар, саясаттағы жолын енді бастап келе жатқан азаматтар да енген. Олардың арасында қабілетті жастар, соның ішінде президенттік жастар кадр резервінің мүшелері де бар.

«Саяси партиялардың белсенділігін, олардың идеологиялық дайындығы мен кәсібилігін ерекше атап өткім келеді. Сайлау науқаны кезінде елдің болашағына тікелей ықпал ете алатын көптеген сындарлы ұсыныс айтылды. Сайлаушылар да бұл жұмысқа белсенді араласып, барлық мәселе бойынша өз пікірін ашық білдірді. Үгіт-насихат жұмыстары кезінде мұны жалпыұлттық телеарналардағы пікірсайыстардан және ақпараттық кеңістіктегі ашық талқылаулардан көрдік», – деді Қасым-Жомарт Тоқаев. 

Президент Құрылтай сайлауы бұрын-соңды болмаған жоғары деңгейде ұйымдастырылған маңызды саяси оқиға болғанын атап өтті.

«Өткен сайлау шетелдік байқаушылар тарапынан үлкен қызығушылық тудырды. Халықаралық қауымдастық сайлау нәтижелерін мойындап, оның ұлттық заңнамаға және қойылатын барлық талаптарға толық сәйкес келгенін растады», – деді мемлекет басшысы. 

Қазақстанда Құрылтай депутаттарының сайлауы 23 тамызда өтті. Дауыс беру қорытындысы бойынша жаңа бір палаталы Парламентке бес саяси партия өтті. Олар – «Әділет», ОСДП, «Ауыл», «Ақ жол» және Respublica партиясы.

Еске салайық,  Қазақстанның саяси партиялары жаңа Парламент – Құрылтайдағы депутаттық мандаттарға ие болған кандидаттардың тізімін жариялай бастады.

Оқи отырыңыз:

• Кім Құрылтай депутаты атанады? Партиялар кандидаттар тізімін жариялай бастады
• 232 адам «Болашақ» стипендиясын иеленді, бүгін тізім шығады