232 адам «Болашақ» стипендиясын иеленді, бүгін тізім шығады

Олардың 179-ы магистратурада, 12-сі докторантурада, бір азамат бакалавриат бағдарламасы бойынша білім алады. Ал 40 қазақстандық шетелдік ұйымдарда кәсіби тағылымдамадан өтеді, деп хабарлайды Orda.kz Халықаралық бағдарламалар орталығы ақпаратына сүйеніп.

Сонымен қатар 33 қазақстандық «Ғылыми тағылымдамалар» бағдарламасы аясында жетекші шетелдік университеттер мен ғылыми-зерттеу орталықтарында ғылыми тағылымдамадан өту мүмкіндігіне ие болды.

«Болашақ» стипендиясы иегерлері мен ғылыми тағылымдамадан өту байқауының жеңімпаздарының тізімі 27 тамыз күні сағат 10:00-ден кейін жарияланады.

Тізімдерді мына ресми ресурстардан көруге болады:

• Қазақстан Республикасының Ғылым және жоғары білім министрі Саясат Нұрбектің Telegram арнасынан;
• Ғылым және жоғары білім министрлігінің Telegram арнасынан;
• Ғылым және жоғары білім министрлігінің ресми сайтынан;
• Халықаралық бағдарламалар орталығы Telegram арнасынан;
• Халықаралық бағдарламалар орталығы сайтынан.

«Болашақ» – Қазақстан азаматтарының әлемдегі жетекші жоғары оқу орындарында білім алуына арналған мемлекеттік халықаралық стипендия. Бағдарлама оқу мен тұруға байланысты негізгі шығындарды өтейді. Стипендия иегері оқуын аяқтағаннан кейін Қазақстанға оралып, белгіленген мерзім ішінде еңбек етуге тиіс.

Айта кетейік, соңғы уақытта «Болашақ» бағдарламасына қатысты түрлі даулар да туындап жүр. Мәселен, сәуір айында депутат Бақытжан Базарбек бағдарламада ауқымды заңбұзушылықтар бар екенін айтып, миллиардтаған теңге көлеміндегі  шығындарға тексеру жүргізуді ұсынған болатын.

Еске салсақ, Бурабай баурайында өткен Ұлттық құрылтайда президент 78 жастағы қазақстандықтың «Болашақ» бағдарламасы бойынша шетелде оқу үшін кеткенін сынға алған болатын.

Тақырыпқа қатысты ұсынамыз:

• ЖИ мамандары алғаш рет «Болашақ» бағдарламасы бойынша тағылымдамадан өтеді
• «78 жасында қандай «Болашақ?»: Тоқаев бағдарламаны сынға алды
• Депутат Базарбек эмоциясын тежей алмай, «Болашақ» жүйесін қатаң сынға алды