Президент: Өткен қайғы-қасіретті ұлттық болмысымыздың арқауы етуге болмайды

Президент Қасым-Жомарт Тоқаев ұлт тарихын жазуда бұрмаланған және күмәнді деректерге жол бермеу керектігін айтты, деп хабарлайды Orda.kz.

Мемлекет басшысы тарихтағы қайғылы кезеңдерді ұмытпау қажет екенін, алайда оларды ұлттық болмыстың негізгі өзегіне айналдыруға болмайтынын атап өтті.

«Ұлттың жадын күмәнді деректермен, бұрмаланған мәліметтермен улауға болмайды. Мұндай әрекет өткен күнге деген сенімді, келешекке деген үмітті әлсіретеді», – деді Тоқаев.

Президенттің айтуынша, Қазақстанның төл тарихы мен әдебиетін тек нәубет пен азапқа толы жылдардың шежіресі ретінде қарастыруға болмайды.

«Біздің төл тарихымыз бен әдебиетіміз шет-шегі жоқ нәубет пен азапқа толы жылдардың жылнамасы емес. Әрине, біз өз тарихымыздағы қиын-қыстау кезеңдерді ешқашан ұмытпаймыз. Алайда халқымыздың басынан өткен қайғы-қасіретті ұлттық болмысымыздың арқауы етуге болмайды», – деді ол.

Тоқаев ұлт тарихында жеңілістермен қатар, жарқын жеңістер мен жетістіктер де аз болмағанын айтты.

«Ұлт тарихы тек жеңіліс пен сәтсіздіктерден тұрмайды, төл шежіремізде жарқын жеңістер мен жетістіктер аз болған жоқ», – деді президент.

Мемлекет басшысы әлем және басқа халықтардың тарихымен қатар Қазақстан тарихына да үстірт әрі біржақты қарауға болмайтынын атап өтті. Оның пікірінше, тарих өкпе-ренішке емес, ұлт мүддесін көздеген шынайы көзқарасқа негізделіп жазылуы керек. Бұл әсіресе өскелең ұрпақ үшін маңызды.

«Тарих өкпе-ренішпен емес, ұлт мүддесін көздеген шынайы көзқараспен жазылуға тиіс. Бұл – ең алдымен өскелең ұрпақ үшін қажет дүние»,  деді Қасым-Жомарт Тоқаев.

Оқи отырыңыз: 

Тоқаев: Сайлау ашық әрі әділ өтті, өте жоғары деңгейде ұйымдастырылды