Премьер-министр бұзылған тамақтан уланып, дертке шалдықты

Израиль елінің премьер-министрі Биньямин Нетаньягу бұзылған тағамды жегеннен кейін ішегі қабынып, ауырып қалды, деп хабарлайды Orda.kz.

Бұл туралы Үкімет басшысының кеңсесі ресми түрде мәлімдеді. Ақпаратқа қарасақ, Нетаньяху 20 шілдеге қараған түні өзін жайсыз сезіне бастаған.

Қазіргі таңда дәрігерлер оның жағдайын бірқалыпты деп отыр. Дәрігерлер премьер-министрге ағзасындағы сұйықтықты қалпына келтіру үшін тамыры арқылы ем жүргізіп жатыр. Алдағы үш күн ішінде ол жұмысын үйден жалғастырады.

Айта кетейік, өткен жылдың соңында Биньямин Нетаньяхуға қуық асты безін алып тастауға ота жасалған болатын. Сол кезеңде премьердің міндетін Израильдің әділет министрі Ярив Левин уақытша атқарған еді.

Айта кетейік, бұған дейін Израиль мен Сирия оқ атуды тоқтатуға келісті. Бұл туралы АҚШ-тың Түркиядағы елшісі Томс Баррак мәлімдеді.