Полиция жоғалып кеткен отбасының ісі бойынша атыраулық «хакерді» іздестіруде

Атырау облысының полиция департаменті әлеуметтік желілерде өзін «хакер» ретінде таныстырып, Жангелдин ауылынан жоғалып кеткен отбасының  мән-жайын өз бетінше анықтадым деп мәлімдеген адамды іздестіріп жатыр, деп хабарлайды Orda.kz тілшісі.

Полицияның мәліметінше, аталған адамның SIM-карталарды, геолокацияны және қаржылық операцияларды талдадым деген ақпараты шындыққа сәйкес келмейді.

«Бұл мәліметтердің барлығы құқық қорғау органдары тарапынан әлеуметтік желілердегі жарияланымдар шықпай тұрып-ақ заңды жедел-іздестіру шаралары барысында анықталып, ресми бағдарлау (ориентировка) ретінде рәсімделген»,  деп хабарлады полиция. 

Департамент өкілдері бұл адамның жаңа деректер таппағанын және өз бетінше техникалық талдау жүргізбегенін, тек тергеудің ресми материалдарымен сәйкес келетін ақпарат таратқанын атап өтті.

Ал «хакердің» өзі жарияланымдарында мемлекеттік жүйелерді бұзбағанын, тек ашық дереккөздерді, байланыс операторларының мәліметтерін және техникалық талдауды пайдаланғанын алға тартады.

Еске салсақ, Атырау облысында жұмбақ жағдайда жоғалып кетіп, 2 айдан кейін денесі табылған ерлі-зайыптылардың жерлеу рәсімі бүгін, 8 қаңтар күні өтті.

Тақырыпқа сай ұсынамыз:

• Атырау облысындағы бір отбасы «дәрігер қабылдауынан» кейін түгелдей із-түзсіз жоғалып кетті
• Атыраудағы қанды қылмыс: Полиция «жоғалған» күйеу баланы ресми түрде іздеуге кірісті