Полицейлер ШҚО-да оқушы қыздың суицид жасағаны туралы ақпаратты жоққа шығарды

Бірқатар БАҚ таяуда ғана Қазнетте соққыға жығылған сәті түсірілген қыздың өз-өзіне қол жұмсағаны туралы ақпарат таратқан.

Құқық қорғау органдары Өскеменде жасөспірімнің өз-өзіне қол жұмсағаны туралы ақпаратты растамады, деп хабарлайды Orda.kz ШҚО полиция департаментіне сілтеме жасап.

«Таратылған ақпаратқа байланысты Шығыс Қазақстан облысының полиция департаменті бұл дерек шындыққа жанаспайтынын хабарлайды» делінген хабарламада.

Тәртіп сақшылары журналистер мен әлеуметтік желілерді пайдаланушылардың есіне Қазақстан Республикасы Қылмыстық кодексінің 274-бабы 2-бөлігінің 3-тармағына сәйкес бұқаралық ақпарат құралдарын немесе ақпараттық-коммуникациялық желілерді пайдалана отырып, көрінеу жалған ақпарат таратқаны үшін үш жылға дейінгі мерзімге бас бостандығынан айыру жазасы көзделген екенін еске салды.

Бұған дейін Қазнетте өскемендік кәмелеттік жасқа толмаған қызды қорлаған видео тараған болатын. Шығыс Қазақстан полиция департаменті соққының бір ай бұрын болғанын хабарлады. Аталған факті ҚР ҚК-нің 293-бабының 2-бөлігі «Бұзақылық» бойынша тіркеліп, сотқа дейінгі тергеу басталды.