Қазақстанда бір апта ішінде 47 орман өрті болды

2–9 тамыз аралығында Қазақстанда 47 орман өрті тіркелді. Бұл туралы Экология және табиғи ресурстар министрлігіне сілтеме жасап Orda.kz хабарлады.

Өрттердің 21-і жергілікті атқарушы органдарға қарасты орман шаруашылығы мекемелерінде, ал тағы 26-сы мемлекеттік орман қоры жерлерінде болған.

Өрт ошақтары жерүсті және әуе патрульдері кезінде, сондай-ақ орман өрттерін ерте анықтау жүйелері арқылы анықталған. Өртті сөндіруге мемлекеттік орман күзетінің қызметкерлері, авиациялық өрт сөндіру десанты және «Қазавиақорғау» республикалық мемлекеттік кәсіпорнының әуе күштері жұмылдырылды.

Жедел қабылданған шаралардың арқасында өрттің таралуына жол берілмей, барлық ошақтар оқшауланып, толықтай жойылды.

Экология министрлігі азаматтарды табиғат аясында демалу кезінде өрт қауіпсіздігі ережелерін қатаң сақтауға шақырды.

Оқи отырыңыз:

• Украина Каспий құбырына соққы жасамауға уәде берді — БАҚ
• Қосымша қолдау жүйесі бар: Грантқа ілінбегендер не істейді?