Перизат Қайраттың алаяқтықпен жиған мүлкі аукционға шығарылады

10 жылға сотталған Перизат Қайраттың ауыз толтырып элита деуге тұратын пәтерлері, қымбат көліктері мен бренд әшекей бұйымдары ашық саудаға шығарылады, деп хабарлайды Orda.kz.

Саудадан түскен қаражат зардап шеккендердің шығынын өтеуге бағытталады. Айта кетейік,  жалпы келтірілген шығын 3,5 млрд теңгеден асады.

Сонымен қатар, қаржы мониторинг агенттігі төрағасының орынбасары Жеңіс Елемесов журналистерге сот процесі кезінде Перизат Қайрат атаған тұлғаларға қатысты іс жүргізілмегенін айтты. Себебі қор қаражатын жымқырған басқа тұлғалар анықталмады.

«Тергеу барысында қор қаржысын жымқырған өзге тұлғалар анықталған жоқ. Сот үкіміне сәйкес сот орындаушылары Перизат Қайраттың мүлкін аукционға шығарып сатады. Сол қаражат есебінен зардап шеккендердің шығыны өтеледі», – деді Елемесов.

Еске сала кетейік,  25 шілдеде «Біз біргеміз» қайырымдылық қорының бұрынғы жетекшісі 10 жылға, анасы 7 жылға сотталды. Жалпы істі қарау кезінде 47 адам жәбірленуші деп танылған.