Павлодарда әйел құлаған ағаштың астында қалып қаза тапты

Павлодарда қатты жел салдарынан ағаш құлап, әйелді басып қалды, деп хабарлайды Orda.kz.

67 жастағы қала тұрғыны шұғыл түрде ауруханаға жеткізілді. Денсаулықты сақтау басқармасының мәліметінше , зардап шеккен адам  алған жарақаттарынан ауруханада қайтыс болды. Атап айтсақ, екі жіліншігі, кеуде сүйегі, жамбас сүйектерінің сынуы, омыртқаның жабық сынуы, ішкі ағзалар жарақаты, 3-4 дәрежелі травматикалық шок.

7 қараша күні таңертең Павлодардың Естай көшесінде қайғылы оқиға орын алды. Қазір бұл істің барлық мән-жайын анықтау үшін тергеу жұмыстары жүргізіліп жатыр.

Жедел жәрдем станциясының баспасөз қызметі хабарлағандай, әйел адам осы жағдайдан қатты жарақат алған.

«Өкінішке қарай, жәбірленуші ауыр жарақат салдарынан көз жұмды. Қазір оқиғаның барлық себеп-салдарын анықтау үшін тергеу амалдары жүріп жатыр», – деп мәлімдеді дәрігерлер.

Төтенше қызмет шақырту алған соң алты минут ішінде оқиға орнына жеткенімен, 67 жастағы кейуананы құтқару мүмкін болмады.

Еске сала кетейік, Қостанай облысында мәдениет үйінің жеке тұрған қазандығында жарылыс болып, ғимарат опырылды.