Павлодар облысының тұрғыны полиция бөлімінде жұмбақ жағдайда қайтыс болды

Қайғылы оқиға 2026 жылғы 11 тамызда болған. Полиция ер адам болған камерадағы бейнежазбаларды тәркіледі, деп хабарлайды Orda.kz.

Qumash мәліметінше, Солнечный кентінің тұрғынын үйінің маңынан ұстап, полиция бөліміне алып кеткен (туыстарының айтуынша, еш себепсіз).

«Сол кезде оның жанында інісі болған. Жарты сағаттан кейін кезекші ер адамның анасына қоңырау шалып, полиция бөліміне келуін сұраған. Оның әпкесінің айтуынша, әйел темір тордың ар жағынан ұлының өлі денесін көрген. Отбасы мүшелерінің көкейінде бірқатар сұрақ қалды: оны не үшін ұстады, камераға орналастырған кезде тінту жүргізілді ме және қызметкерлер не болып жатқанын қалай байқамай, қайғылы жағдайдың алдын алмаған?»  делінген жарияланымда.

Павлодар облысының полиция департаменті бізге жағдайға қатысты түсініктеме берді.

«Екібастұз полициясына үй ауласында мас ер адамның әйелді күш қолданумен қорқытып жатқаны туралы шақырту түскен. Оқиға орнына келген қызметкерлер жанжал шығарған ер адамды ұстап, бөлімге жеткізген. Анықталғандай, ер адам бұған дейін сотталған және бірнеше рет әкімшілік жауапкершілікке тартылған»,  деп атап өтті ведомствоның баспасөз қызметі.

Полицияның мәліметінше, құқық бұзушы арнайы бөлмеге орналастырылған. Біраз уақыттан кейін оны сол жерден ес-түссіз күйде тапқан. Көрсетілген медициналық көмекке қарамастан, ер адам қайтыс болды.

Полиция қызметкерлері камерадағы бейнежазбаларды тәркіледі.

Оқи отырыңыз: 

• Заңгері әйеліне тұрмыстық зорлық-зомбылық жасағаны үшін сотталды
• Садыр Жапаров екінші президенттік мерзімге сайлауға түсу жоспарын жариялады