Павлодар облысының тұрғыны өзінің үш жасар қызын өзгеден деген күмәнмен азаптап өлтіріп, өмір бойына сотталды

16 маусым күні қылмыстық істі Павлодар облысының қылмыстық істер жөніндегі мамандандырылған ауданаралық соты қарады. Ер адамға кәмелетке толмаған, дәрменсіз баланы азаптау, сондай-ақ аса қатыгездікпен жас қызды өлтіру айыптары тағылған, деп хабарлайды Orda.kz.

Сот анықтағандай, сотталушы қыздың әкесі бола тұра, ұзақ уақыт бойы оған жүйелі түрде күш қолданып, физикалық тұрғыда азаптап келген. 2025 жылдың қыркүйегінде ол ішімдікке мас кезінде баланы аса қатыгездікпен өлтірген.

Айыпталушының кінәсі жәбірленушінің, куәлардың жауаптарымен, сараптама қорытындыларымен және қылмыстық іс материалдарымен дәлелденді.

Мемлекеттік айыптаушы ер адамға өмір бойына бас бостандығынан айыру жазасын тағайындауды сұрады. Жәбірленуші тарап бұл талапты қолдап, моральдық шығын ретінде 5 миллион теңге өндіру туралы азаматтық талап арыз берді.

Ал айыпталушы мен оның қорғаушысы айыпты жеңілірек бапқа қайта саралауды сұрап, абайсызда адам өліміне әкеп соққан әрекет ретінде қарауды және соған сәйкес жаза тағайындауды өтінген.

Істі қарау қорытындысы бойынша сот ер адамды кінәлі деп танып, қылмыстар жиынтығы бойынша оған төтенше қауіпсіздік мекемесінде өтеу арқылы өмір бойына бас бостандығынан айыру жазасын тағайындады. Жәбірленуші тараптың азаматтық талабы толық көлемде қанағаттандырылды. Үкім әлі заңды күшіне енген жоқ.

Әлеуметтік желілерде жарияланған мәліметтерге сәйкес, сотталған азамат Тереңкөл ауданында тұрған. Ол жұбайымен бірге екі бала тәрбиелеген, үш жасар қызы және 2025 жылдың мамыр айында дүниеге келген ұлы болған.

Белгілі болғандай, ер адам қызды өзінің биологиялық баласы деп есептемеген, оның «басқадан»  туылғанына сенімді болған.

Оқи отырыңыз:

• Жазушы Өтебай Қанахиннің немересінің өлімі қоғамдық резонанс пен депутаттың қозғау салуынан кейін ғана алға жылжыды
• Шалбарын шешпек болған: Шымкентте 8 жастағы қызға анайы қылық көрсеткен ер адам айыппұлмен құтылды